اسلام آباد۔ 04 فروری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان نا کوالالمپور نا دورہ تاریخی اہمیت تخک، وزیراعظم مہاتیر محمد و وزیراعظم عمران خان اواری اٹ ہڑتوم آ ملک آتا نیام اٹ سنگتی، پت، مہر و مریبت، کمکاری و شریداری عمل نا پوسکن ءُ بشخ اس لکھنگ ءُ۔ سے شنبے نادے آ تینا ٹویٹ اٹی ڈاکٹر فردوس عاشق اعوان پارے کہ دا سنگتی، پت و مہر و مریبت پاکستان و ملائیشیا نا نیام اٹ شونداری و شونہالی نا پوسکن آ درگہ مریک۔ ہڑتوم آ وزیراعظم آک امت مسلمہ و اسلام نا ترجمان مرسا دنیا ٹی بسنو۔ اوپارے کہ پاکستان و ملائیشیا نا الس تون اوار مچ آ امت مسلمہ کن دا ہڑتوم آ کنڈآتا شریداری عمل خوشخبری آنبار ءِ۔
