اسلام آباد۔ 04 فروری (اے پی پی) بنجائی وزیر ریلوے شیخ رشید احمد تون پاکستان اٹی جرمنی نا سفیر برن ہارڈ سکلیگ ہیک اوڑدہی کرے ہراٹی پاکستان ریلوے ٹی برجا شونداری ڈٹ خاص وڑاٹ کراچی پشاور مین لائن ون ڈٹ آ گپ و تران کننگا۔ جرمن سفیر وزیر ریلوے ءِ پاکستان ریلوے نا کمک اٹ تدوک آ ہفتہ راولپنڈی آن کراچی سفر نا بابت معلومدار کرسا پارے کہ ریلویز پاکستان نا دودوربیدہ و علاقہ غاتے گنڈک، سفر اٹی پاکستانی خلقت تون ملنگ اسہ جوان ءُ آزموندہ اس مس۔ بنجائی وزیر ریلوے شیخ رشید احمد پارے کہ پاکستان ریلوے نا شونداری ملکی زرگزران کن المی ءِ، ریل نیٹ ورک ءِ ایم ایل ون ڈٹ اتون اپ گریڈ کننگ اُن، سی پیک ڈٹ آتا رداٹ کراچی و پشاور نا نیام اٹ 1872کلومیٹر ٹریک نا اپ گریڈیشن نا کاریم ہندا سال بناکیک۔ اوپارے کہ ایم ایل ون ڈٹ آن کراچی و راولپنڈی ٹی سفر نا وخت و پاس بیرہ دہ گھنٹہ مریک، ایم ایل ون ڈٹ آن مال گاڈی تا ہن و بر اٹ ودکی مریک۔ پاکستان ریلوے ءِ نسخان آن نجات ملک۔ اوپارے کہ پاکستان ریلوے سالانہ ہفت کروڑ مسافر آتے سفر کننگ آ آسراتی فراوان کیک، اڑزان ولے رکھ سواری اولیت ءِ۔ وزیر ریلوے جرمن سفیر نا پاکستان ریلوے اٹ سفر کننگ آ منت واری ءِ ہرفے۔ پاکستانی دودوربیدہ ءِ تالان کننگ اٹ جرمن سفیر نا خذمت آتا ستاءِ کرے۔
