کراچی۔ 04 فروری (اے پی پی) صدر مملکت ڈاکٹرعارف علوی جان جوڑی نا آسراتی تا فراوانی و تعلیم نا دوئی کننگ آ زور شاغسا پارے کہ طب انا بشخ انسانیت نا خذمت نا پن ءِ، طب انا تعلیم اٹی انسانی ہمدردی و انسانیت تون مہر و مریبت نا ہم بایدے ہیل تننگے، کرونا وائرس مچ آ دنیا ٹی ترندی اٹ تالان مننگ ءِ، دانا توننگ کن ویکیسن تیار کننگ آ ترندی اٹ کاریم برجاءِ۔ داخیال آتا درشانی ءِ او سے شنبے نادے آ فضائی روتھ پی اے ایف یو میڈیکل کالج نا بنائی دود آن تران کرسا کرے۔ صدر مملکت پارے کہ طب انا بشخ انسانیت نا خذمت نا پن ءِ، ڈاکٹر و استاد راج انا بے کچ شرف نا قابل ءُ کسب اسے ءُ۔ اوپارے کہ طب انا تعلیم اٹی انسانی ہمدردی و انسانیت تون مہر و مریبت ہم بایدے ہیل تننگے، معالج نا مریض نا زرگزرانی و راجی ویل آتیان معلومدار مننگ المی ءِ۔ اوپارے کہ چین سرسہبی اٹ تینا 880 کروڑ بندغ آتے نیزگاری نا دلدل آن کشا۔ اوپارے کہ مہالو راج و چاگڑد نادرا تپہ غاتا خذمت نا جوزہ تخارہ۔ ڈاکٹر آک تینا پریکٹس اٹی انسانی خذمت نا جوزہ نا درشانیءِ کیر و دا جوزہ اوفتے ٹی اوفتا لمہ و باوہ غاتے ودی کننگ کیک۔ صدر پارے کہ ساڑی دور اٹی چندی تپہ غاتا نیام اٹ رابطہ غاتے ٹی کمتی ءِ ہرانا سوب آن اسہ ایلو نا مشکل آتیان آگاہی مفک۔ اوپارے کہ جان جوڑی و تعلیم نا آسراتی گچین مریک تو ملک شون ہلیک، جان جوڑی و تعلیم نا آسراتی تا فراوانی بایدے اولیت مرے۔ ننا مذہب اٹی سفائی و پاکیزگی آ زور تننگانے۔ ڈاکٹر عارف علوی پارے کہ مچ آ دنیا ٹی کروناوائرس نا خطرہ ودنگ ءِ، داوڑنا وائرس نا ویکسین جوڑ مننگ اٹ وخت لگک۔ سارس وائرس نا ویکسین نا جوڑ مننگ اٹ 6 تُو لگا، مننگ کیک کرونا وائرس نا ویکسین زوت تیار مرے۔ اوپارے کہ ملک اٹی ایچ آئی وی، تپ دق و ہیپاٹائٹس نا ناجوڑی تیٹی ودکی مننگ ءِ، ملک انا 8 درسد آبادی ہیپاٹائٹس نا گواچی ءُ۔
