پتراجایا۔ 04 فروری (اے پی پی) وزیر خارجہ شاہ محمود قریشی پارینے کہ وزیراعظم نا دورہ غان ملائیشیا تون دوستانہ تعلقداری تے سٹریٹجک تعلقداری ٹی بدل کننگ اٹ کمک رسینگک، پاکستان مسلم امہ ءِ بشخ آخا بلکن یکجا کننگ خواہک۔ سے شنبے نادے آ اسہ انٹرویو اسے ٹی وزیر خارجہ پارے کہ ملائیشیا تون واپار و دفاع نا بشخ آتے ٹی کمکاری ءِ ودفنگ آ ہیت مس وخت اس کہ وزیراعظم نا دورہ ٹی ملائیشیا تون 3معاہدہ غاتیا دستخط مس۔ اوپارے کہ ملائیشیا ٹی 82ہزار پاکستانی افرادی قوت چندی بشخ آتے ٹی کاریم کننگ ءُ، اسہ معاہدہ اس ملائیشیا ٹی پاکستانی افرادی قوت نا حق انا رکھ اکن کننگانے، معاہدہ نا رداٹ اگہ پاکستانی ورکراس ملائیشیا ٹی زوال کرے تو اونا خاہوت ءِ پنشن ملک۔ اسہ سوج اسے نا ورندی ٹی وزیر خارجہ پارے کہ اینخو نا سال ملائیشیا غان بروک آ ترسیلات زر اٹی 35 درسد ودکی مس، ملائیشیا ٹی رہینگوک آ پاکستانیک اینخو نا سال اسہ ارب 55 کروڑ ڈالر وطن آ مون تسر۔ وزیر خارجہ پارے کہ وزیراعظم پیدوار کرے کہ پاکستان مسلم امہ ءِ بشخ آخا بلکن یکجا کننگ خواہک۔
