اسلام آباد۔ 03 فروری (اے پی پی) اسپیکر قومی اسمبلی اسد قیصر پارینے کہ مشکل نا داساہت اٹی کشمیری الس تون تفنگ ننا فرض ءِ انتئے کہ دا انسانیت نا ویل ءِ، کشمیری تتون ئسن و مدام مرینہ، ہروڑنا سیاسی وابستگی تیان ایڑ تر مرسا کشمیر نا ویل آ اسیجا قرارداد اس منظور کینہ۔ دوشنبے نادے آ ایف نائن پارک اٹی یوم یکجہتی کشمیر نا مناسبت اٹ اڈ ہلوک آ دود آن تران کرسا اسپیکر پارے کہ کشمیری الس تینا حق خودارادیت نا دوئی کننگ کن لازوال قربانی تسنو۔ اوپارے کہ بھارتی وزیراعظم نریندر مودی آر ایس ایس و ہٹلر نا سوچ آ عمل کننگ ءِ۔ کشمیری تیا بھارتی ظلم کاٹم آن گدرینگانے و دا ظلم انا مثال نا دنیا نا تاریخ اٹی ملنگ مشکل ءِ۔ اوپارے کہ کشمیری الس تون تفنگ ننا فرض ءِ۔ کشمیریک تینا شہید آتے پاکستانی بیرک اٹ جہہ جاگہ کیرہ و پاکستان زندہ باد نا نعرہ ءِ خلیرہ۔ اوپارے کہ کشمیر نا ویل انسانیت نا ویل اسے۔ جہانی برادری دا انسانی المیہ آ چکار کے۔ مودی کشمیری الس آن بنداوی حق ءِ پلانے۔ ہر پاکستانی کشمیری تتون ئسر و مدام اریر۔ اسپیکر قومی اسمبلی نا پاننگ ئس کہ غٹ سیاسی وابستگی تیان ایڑ ترمرسا کشمیر نا ویل آ اسیجا قرارداد اس منظور کننگک انتئے کہ کشمیریک پاکستان کن بے کچ قربانی تسنو۔ اسد قیصر نا پاننگ ئس کہ دا امر و جمہویت اسے کہ ہموڑے رہینگوک آتے بند کننگے۔ مقبوضہ کشمیر اٹی دوائی و خور انا کاختی ودی مسنے۔ کشمیر اٹی میڈیا غا ہم پابندی خلنگانے۔ اوپارے کہ پاکستان اٹ رہینگوک آ ہر پاکستانی کشمیری تتون تفوک ءِ۔ اسپیکر قومی اسمبلی دا وخت آ کشمیری الس تون یکجہتی نا درشانیءِ کننگ کن مہران گیٹ آن ایوان قائد اعظم اسکان واک اٹ ہم بشخ ہلکر۔
