اسلام آباد۔ 20 فروری (اے پی پی) ترسیلات زر انا وصولی تیٹی سوگوی و ودکی کن افرادی واک ئِ مارکیٹ نا گرج آتا رداٹ تربیت تننگ نا گرج ئِ۔ بھارت و بنگلہ دیش نا ہڑزان و گچین تربیت یافتہ افرادی واک انا سوب ترسیلات زر انا وصولی ٹی کمتی واقع مسنے۔ سٹیٹ بینک آف پاکستان نا حساب وکتاب نا رداٹ گدرینگوک آ مالی سال انا مقابلہ ٹی اینخو مالی سال اٹی سمندر پار رہینگوک پاکستانی تاکنڈآن گدریفوک آ ترسیلات زر انا کچ اٹی 2 درسد نا خڑک کمتی واقع مسنے۔ رپورٹ نا رداٹ امریکہ، برطانیہ ، سعودی عرب ومتحدہ عرب امارات آن گدریفوک آ ترسیلات زر کم مسنے و سعودی عرب آن ترسیلات زراٹی 5.6درسد نا کمتی آن ترسیلات نا کچ 3.70ارب ڈالر، یو اے ای آن کروک آ ترسیلات اٹی 1.8درسد نا کمتی آن ترسیلات نا کچ 2.44 ارب ڈالر وخت اس کہ ایلوخلیجی ملک آتیان 1.7درسد نا کمتی آن 1.34ارب ڈالر نا ترسیلات موصول مسنے۔ سمندر پار رہینگوک پاکستانی ہر سال ارب آ ڈالر پاکستان آ گدریفرہ ولے گدرینگوک آ منہ سال اٹی بھارت و بنگلہ دیش تون اوار ایلو ملک آتا ہڑزان و گچین ہنر مند افرادی واک انا دستیابی آن امریکہ ، برطانیہ ، سعودی عرب و یو اے ای وغیرہ ٹی پاکستانی افرادی واک انا طلب اٹی کمتی واقع مسنے ہراڑآن ترسیلات زرہم کم مسنے۔ اقتصادی چاہندار آک پارینو کہ ترسیلات زر انا کچ اٹی ودکی کن جامع حکمت عملی نا رداٹ افرادی واک ئِ مارکیٹ نا گرج آتارداٹ تربیت تننگ نا گرج ئِ۔
