اسلام آباد ۔ 22 جنوری (اے پی پی)دری کارانی وزیر شاہ محمود قریشی ءَ گوشت کہ دراھیں فریقاں را صبر ءِ درشان کنان ءَ ،جاورھال ءَ را لس کنگ ءِ ھاترا سنجیدگ ءِ کوشستاں را کارمرز کنگ ءِ ضلورت انت، برطانوی حکومت 80 لکھ معصو میں کشمیریاں را بھارت ءِ زلم ءُُ زوراکی چہ نجات دیگ ءُُ کشمیر ءِ جیڈھ ءِ سرا پُرامن حل ءِ ھاترا وتی شریں کرد ءَ ادا کن ایت ۔ اے ھیالانی درشان آہاں چار شمبے ءَ برطانوی دری کارانی وزیر ڈومینک راب ءِ گوما ٹیلی فون ءِ سرا گپ ءُُ تران کنان ءَ کتگ ات ۔ گپ ءُُ تران ءِ تہ وت مہ وتی ھاسیں دمگی ءُُ دودیمی معاملہانی سرا ھیال ریچی کتگ ۔ دری کارانی وزیر مخدوم شاہ محمود قریشی ءَ وتی برطانوی ہمکار ءَ را خطہ ءِ تہ ودی بوتگیں کشیدگی، امن وامانءِ نگیگ ءِ جاورھال ءُُ اے ھوالہ چہ پاکستان ءِ نیمگا چہ ممکنہ خدشات ءَ چہ سرپد کتگ ۔ آہاں گوشت کہ دراھیں فریقاں صبر ءِ درشان کنگ انت،جاورھال ءَ را لس کنگ ءِ ضلورت انت ۔ دری کارانی وزیر ءَ برطانوی ہمکار ءَ را،خطہ ءِ تہ کشیدگی ءِ ھلاسی ءِ ھاترا پاکستان ءِ نیمگا چہ کتگیں کوشستاں چہ سرپد کتگ ۔ دری کارانی وزیر ءَ مقبوضہ کشمیر ءِ تہ بھارت ءِ نیمگا چہ زلم ءُُ زوراکی ءُُ انسانی حقانی نگیگ ءِ ھلاپ ورزی ءَ چہ سرپد کنان ءَ لوٹ کرتگ کہ برطانوی دری حکومت 80 لکھ معصو میں شہریانی سرا زلم ءُُ زوراکی ءِ ھلاسی ءُُ کشمیر ءِ جیڈھ ءِ پُرامنیں حل ءِ ھاترا وتی شریں کرد ادا کن ایت ۔ دری کارانی وزیر شاہ محمود قریشی ءَ وتی برطانوی ہمکار ڈومینک راب ءَ را وتی اولی لڑ ءَ پاکستان ءِ تروتاب ءِ دعوت داتگ ۔ برطانوی دری کارانی وزیر ءَ خطہ ءِ تہ امن ءُُ ایمنی ءِ برجاہی ھاترا پاکستان ءِ کوشستانی ستا کتگ ۔ برطانوی دری کارانی وزیر ڈومینک راب ءَ پاکستان ءُُ برطانیہ ءِ میان ءَ دودیمی سیادی ءِ نوعیت ءِ سرا تسلہ ءِ درشان کتگ ۔ دوئیں وزیراں پاک برطانیہ دودیمی سیادی ءِ پراھی ءُُ خطہ ءِ تہ امن ءِ برجاہی ھاترا یکجاھیں کوشست ءَ را کارمرز کنگ ءِ سراتپاک کتگ ۔
