اسلام آباد۔ 15 فروری (اے پی پی) صدر مملکت ممنون حسین ڈریونگ لیسن نا دوئی کن چارشنبے آ اسلام آباد ٹریفک پولیس آفس نا دورہ ئِ کرے۔ صدر لس شاری تیانبار ڈریونگ لیسن نا دوئی کن ہردے نا غٹ وڑوڈول آتیان گدرینگا ۔ صدر مملکت تینا ٹوکن نمبر 0441ئِ تینٹ ہلک و تعلقدار سوج آتا ورندی ئِ ہم تس۔ اواسلام آباد ٹریفک پولیس نا کسبی لائخی ، دیانت داری و الس دوستانہ خذمت نا ستائِ کرے۔ صدر داہیت انا ستائِ کرے کہ ڈریونگ لیسن نا درخواست گزار آتے اسہ ہی چھت اسے نا کیرغ طبی معائنہ ، فوٹو گرافر و ہردے نا فیس انا ہلنگ نا آسراتی فراوان کننگانے۔ اوپارے کہ حکومت ہروڑ لس خلقت نا آسراتی نا عزم ئِ کرینے۔ داوخت آ صدر مملکت ممنون حسین الس اتون ہیت و گپی مس و اوفتا جان جوڑی نا بارواٹ ہریفے۔ اسلام آباد ٹریفک پولیس آفس بننگ آ آئی جی اسلام آباد، ایس ایس پی ٹریفک صدر مملکت نا خیرمقدم ئِ کریر و تینا دفتری معاملہ غاتا بابت معلومدار کریر۔ صدر مملکت ممنون حسین داکان مست کراچی آن ڈریونگ لیسن اس ہلکوسس ولے داسہ او اسلام آباد آن لیسن نا تجدید ئِ کرفینے۔ داچرجوئی ٹی کراچی ٹریفک پولیس کانود نا رداٹ این او سی جاری کرے۔
