بلوچستان اٹی 1.58 ارب روپئی نااسکول میل پروگرام نا بناء

اسلام آباد۔ 23 جون (اے پی پی ) بلوچستان حکومت چناتا غذائی گرج آتے پورو کننگ و جان جوڑی نا گچین نتیجہ دوئی کننگ کن کوئٹہ نا پرائمری اسکول آتا طالب علم آتیکن 1.58ارب روپئی مالیت نا اسکول میل پروگرام نا بناءِ کرینے۔ ویلتھ پاکستان ءِ دوئی سرکاری دستاویزات آتا رداٹ بلوچستان لمہ و چنانا جان جوڑی، اسکول آتیٹی غذائیت، واٹر، سینی ٹیشن اینڈ ہائجین (واش) انفراسٹرکچر و ڈی ورمنگ پروگرام تے تینا شونداری اولیت آتیٹی اوار کرینے۔ کوئٹہ نا پرائمری اسکول آتا طالب علم آتیکن اسکول میل پروگرام پائلٹ بنداو تیا بناءِ کننگانے۔ ہرانا جم خڑچ 1.579 ارب روپئی ءِ وخت اس کہ برمالی سال اٹی داڑکن 315.9 ملین روپئی جتا کننگانے۔ داپروگرام صوبہ ٹی برجا غذائیت نا بابت چندی ڈٹ آتیان اسٹ ءِ ہرافتا مسخت چناتا جان جوڑی و غذائی حالیت آتے گچین کننگ ءِ۔ دستاویز آتا رداٹ بلوچستان اٹی لمہ و چنانا جان جوڑی نا جوان پروگرام ہم برجاءِ، ہرانا کل خڑچ 2 ارب روپئی ءِ وخت اس کہ داڑکن 228.8 ملین روپئی جتا کننگانے۔ ہندا وڑ اسکول آتیٹی واٹر، سینی ٹیشن اینڈ ہائجین (واش) آسراتی تا فراوانی کن اسہ جتا ڈٹ اس ہم زیر عمل ءِ، ہرانا جم خڑچ 2 ارب روپئی و برجاسال اکن جتا زر 200 ملین روپئی ءِ۔ رپورٹ نا رداٹ کوئٹہ نا ایسٹرن بائی پاس نا ہند آلمہ، پوسکن ودی مروک و چنانا جان جوڑی نا اسہ پوسکن آسراتی اس جوڑ کننگانے ہراڑآ جم وڑاٹ 400 ملین روپئی خڑچ بریک وخت اس کہ دا ڈٹ اکن 200 ملین روپئی جتا کننگانے۔ دا ڈٹ بلوچستان اٹی جان جوڑی و غذائیت نا ٹک آتے گچین جوڑ کننگ کن صوبائی حکومت نا گیشتر حکمت عملی نا بشخ ءِ۔ حکومت غذائیت، لمہ و چنانا جان جوڑی، اسکو ل آتیا تالان نیام تمنگ و سفائی نا بنداوی پنجر ءِ صوبہ نا اہم شونداری اولیت گوندانے۔