سوئٹزر لینڈ اٹی اہم بریک تھرو آن جہانی امن مریک، ملک انا حقی شونداری ہر چار آ صوبہ غاتا اسہ وڑشونداری تون تفوک ءِ، وزیراعظم شہباز شریف نا قومی اسمبلی ٹی گپ وتران

اسلام آباد۔ 23 جون (اے پی پی ) وزیراعظم محمد شہباز شریف ایران و امریکہ نا نیام اٹ جنگ بندی نا معاہدہ ٹی پاکستان نا ثالثی کڑد ءِ تاریخی سرسہبی گوندسا پارینے کہ سوئٹزر لینڈ اٹی مروک آ دا اہم بریک تھرو آن جہانی امن مریک، ملک انا حقی شونداری ہر چار آ صوبہ غاتا اسہ وڑ شونداری تون گنڈوک ءِ۔ او سے شنبے نادے آ قومی اسمبلی ٹی گپ وتران کریکہ۔ وزیراعظم شہباز شریف پارے کہ ای اپوزیشن لیڈر نا مون آ گڑاس معروضہ پیش کننگ خواہسوٹہ ولے او داوخت آ ایوان اٹی افس۔ اوپارے کہ اینو ولدا اسہ تاریخ ساز ءُ دے اسے، ہراتم ملخدو برگن سٹاک (سوئٹزرلینڈ) اٹی ایران و امریکہ نا نیام اٹ منہ دے مست طے مروک آ ایم اویو نا چرجوئی ٹی ہڑتوم آ ملک آتا سرکڑدہ غاک دانگیا بسر ہراڑآ پاکستان ہم بطور ثالث دستخط کریسر۔ الحمداللہ پاکستان ہموڑے بھاز خلوص و عرق ریزی اتون ہڑتوم آملک آتا نیام اٹ فاصلہ غاتے کم کننگ کن تینا پبی کوشست آتے کرے ہراٹی دے و نن گپ وتران نا چرجوئی چلینگسا کرے۔ بالآخر سہب انا کم و ود دونیم سہ بجہ غا اسہ اسیجائی اعلامیہ اس تیار کننگا ہرانا غٹ فریق آک توثیق ءِ کریر۔ اوپارے کہ اینو الحمداللہ اللہ تعالیٰ نا فضل و کرم اٹ امریکہ و ایران نا نیام اٹ نئے بیرہ جنگ بندی مسنے بلکن بروک آ 60 دے تیٹی ٹیکنیکل مذاکرات مریک ہرافتے ٹی اہم باندات آتیا گپ وتران مریک، ننے پورو اومیت ءِ کہ ان شاء اللہ داایم اویو60 دے انا تہہ ٹی اسہ پائیدار معاہدہ سے ٹی بدل مریک ہراڑآن دنیا ٹی امن مریک۔ وزیراعظم شہباز شریف اسپیکر قومی اسمبلی سردار ایاز صادق ءِ مخاطب کرسا پارے کہ ای اینو نے ، قائد حزب اختلاف ءِ، داایوان اٹی ساڑی غٹ شرفمند آ باسک آتے و پاکستان نا 24 کروڑ الس  ءِ است انا ہب اٹ مبارکبادی ایتیوہ، انتئے کہ دا جنگ بندی نا عمل اٹی پاکستان ہرا اہم کڑد ءِ ادا کرینے ، او نئے بیرہ تاریخ ساز ءِ بلکن دنیا نا پنی آ اخبارآک، چائے او واشنگٹن پوسٹ مرے، فنانشل ٹائمز مرے یا نیو یارک ٹائمز ، غٹ تینا فرنٹ پیج آ پاکستان نا دا کڑد ءِ نمان کرینو۔ داڑے ساڑی شرفمند باسک آک داہیت ءِ پک کیرہ کہ پاکستان نا بابت دا ہرامثبت بیانیہ و عزت مون آ بسنے، اگہ نن ارب آ روپئی ہم خڑچ کرینہ ولداہم دا دے دوئی کننگ کتونہ۔ ای خواہسوٹہ کہ قائد حزب اختلاف نا مو ن آ داہیت آتے کریٹہ ولے ای مون آ کاوہ۔ کنے بھاز خوشی اتون داپاروئی ءِ کہ اینو الحمداللہ ایران نا صدر و کنا بھا ز ہنین آ ایلم ڈاکٹر مسعود پزشکیان پاکستان آ بننگ ءُ۔ وزیراعظم شہباز شریف پارے کہ اپوزیشن لیڈر پارے ’’شہباز شریف دادے ہرا تقریر ءِ کرے، اوٹی مزہ بتو‘‘ و اوداڑے تینا ڈیسک ءِ خلنگ آ ہم ہیت کرے۔ ای اگہ ڈیسک ءِ خلکٹ تو دا صادق جوزہ غاتون خلکٹ کہ اینو پاکستان اٹ یکجہتی و صوبہ غاتا نیام اٹ ہم گرنچی ودی مننگ ءِ و پاکستان ءِ ہراعزت ملانے او اللہ تعالیٰ نا بے پایاں فضل و کرم ءِ ہرانا اخس کہ شکر ءِ ادا کننگے کم ءِ۔ ای ہندا جذباتی وڑاٹ دا بابت ہیت کروٹ، ہراتسکان بلوچستان آ وسیلہ غاتا خڑچ کننگ نا تعلق ءِ تو نم کنا تقریر نا ریکارڈ ءِ کشفسا ہبو۔ ہر چار آ صوبہ غاک خوشی اتون دا فیصلہ کریر و ننے بھاز خوشی ءِ، کنا لوز آک دائسر کہ پنجاب ایلو صوبہ غاتون اواری اٹ سالانہ 11 ارب روپئی دامسخت کن بشخ شاغنگ ءِ۔ وزیراعظم شہباز شریف پارے کہ اپوزیشن لیڈر اینو ہراہیت ءِ کرے او راستی تیان چپ ءِ۔ ای مدام دا پارینٹ کہ اگہ بیرہ پنجاب شون ہلیک تو او پاکستان نا شونداری اف، اگہ بیرہ صوبہ سندھ شون ہلیک تو او ہم پاکستان نا شونداری اف۔ ہراتم اسکان ہر چار آ صوبہ غاک شونداری نا دا رُمب اٹی بریبر نا شریک مفسہ، او پاکستان نا شونداری پاننگ مفک۔ ای وار وار آ داہیت ءِ پارینٹ۔ ولے اینو او اودے جتا رنگ تسر ہرانا کنے افسوز ءِ۔ بہرحال دااوفتا تینا ذہنی اختراع ءِ۔ وزیراعظم شہباز شریف پارے کہ نم 2018ء نا الیکشن نا جاست وپاست ءِ کبو، انت دا گچین کاری ٹی پبی جادوگری متو؟ انت بیلٹ باکس آتے پُر کننگ متو؟ انت مخلوق ءِ پٹہ بیرفسا اسلام آباد آ اتنگتو و دھڑ کو تننگتو؟ نم 2018 نا گچین کاری تے ہرفبو ہبو، اگہ او کانودی و آئینی حکومت ئس تو ولدا دا ہم اسہ روا و کانودی حکومت ءِ، اگہ اوفتے جاست وپاست نا بھاز شوق ارے تو 2018آن اونا بناءِ کیرہ، اوکان پد نن 2024ء نا گچین کاری تا جاست وپاست آہم برینہ ہیت پیش تما تو بھاز مراسکان کاہک، ای ہنداڑآ تینا ہیت ءِ چٹیفیوہ۔ ببو اینو ایران نا صدر نا پبی و والہانہ بیابخیری ءِ کننگ کن نن بایدے تیاری کین، نئے کہ اینو نادے دا جھیڑہ غاتیٹی تمن۔