وزارت قومی جان جوڑی ٹی انٹیگریٹڈ ٹاسک مینجمنٹ سسٹم نا بناء

اسلام آباد۔ 23 جون (اے پی پی ) بنجائی وزیر جان جوڑی مصطفیٰ کمال نا پارت آ وزارت قومی جان جوڑی و اونا ماتحت ادارہ غاتیٹی گچین ای گورننس نا مون آ دننگ کن انٹیگریٹڈ ٹاسک مینجمنٹ سسٹم نا باقاعدہ بناءِ کننگانے۔ دا چرجوئی ٹی بنجائی وزیر جا ن جوڑی مصطفیٰ کمال نا کماشی ٹی وزارت جان جوڑی نا ماتحت ادارہ غاتا سروک آتا دیوان اس اڈ ہلک، ہراٹی آفیسر آتے پوسکن آ انٹیگریٹڈ ٹاسک مینجمنٹ سسٹم نا چندی پلو و اونا وڑوڈول نا بارواٹی سرجمی اٹ حوال تننگا۔ دیوان آن تران کرسا وزیر جا ن جوڑی مصطفیٰ کمال پارے کہ پوسکن آ دور انا خواست آتا رداٹ ڈیجیٹل نظام نا مون آدننگ المی ءِ و وزارت جان جوڑی ٹی درستی راستی کرفوک آ پوسکن آ انٹرنل ٹاسک مینجمنٹ سسٹم شفافیت ، کارکڑد و گچین حکمرانی نا مون آدننگ اٹ اہم کڑد ادا کیک۔ اوپارے کہ ٹاسک مینجمنٹ سسٹم نا کمک اٹ وزارت نا غٹ کاریم آن لائن، پیدوار و قابل چاروکی مریک وخت اس کہ ہرٹاسک انا پیش رفت، زمواری و پوروی نا پورو ریکارڈ ہم رکھ تخنگک ۔ اونا رداٹ وزارت نا غٹ پرمان و پارت آتے اسہ مرکزی ڈیجیٹل پلیٹ فارم اسے آ گدریفنگانے۔ مصطفیٰ کمال پارے کہ نظام نا رداٹ اسہ ریئل ٹائم ڈیش بورڈ اس فراوان کننگانے ہرانا کمک اٹ تروک آ ٹاسک آتا پیش رفت ہروخت اسہ ہی پلیٹ فارم اسے آ ہُننگ مریک۔ اوپارے کہ او تینٹ ہم تروک آ ٹاسک آتا براہ راست مانیٹرنگ ءِ کیک تانکہ تخوک آ ہدف آتے وخت آ دوئی کننگ مرے۔ بنجائی وزیر جان جوڑی پارے کہ دا گام وزارت جان جوڑی ءِ پورو وڑاٹ ڈیجیٹل و پیپر لیس نظام نا کنڈآ دننگ اٹ اسہ مزل نا نشان اس جوڑمریک۔ اوپیدوار کرے کہ آخبت غٹ امور ٹاسک مینجمنٹ سسٹم نا رداٹ چلیفنگک و ہندا بنداو آ جوابدہی، کارکڑد نا جاچ و انعام و سزا نا تعین ءِ کننگک۔ اومستی پارے کہ پوسکن آ نظام نا نفاذ آن روایتی وڑوڈول اٹی نمان کمتی بریک و سرکاری امور نا انجام دہی ٹی رفتار و شفافیت ودک۔ وزیرجان جوڑی آفیسر آتے پارت کرے کہ او داپوسکن آنظام ءِ پورو سنجیدگی اٹ تینا کیر و دانا گچین نفاذ ءِ پک کیر۔ اوپارے کہ داگام حکومت نا شفافیت ، گچین حکمرانی و پوسکن ڈیجیٹل نظام نا مون آ دننگ نا وژن نا عین رداٹ ءِ۔