وزیراعظم نا سلاہکار نجکاری نا ترکیہ نا وزیر توانائی و قدرتی وسیلہ تون اوڑدہی، توانائی نا بشخ اٹی ہڑتوم آ کنڈآتا کمکاری ءِ سوگو کننگ آ گپ وتران

اسلام آباد۔ 23 جون (اے پی پی ) وزیراعظم نا سلاہکار نجکاری محمد علی تدوک آ دے انقرہ ٹی توانائی و قدرتی وسیلہ غاتا وزارت نا دورہ ٹی جمہوریہ ترکیہ نا وزیر توانائی و قدرتی وسیلہ تون اہم اوڑدہی اس کرے۔ سے شنبے نادے آ وزارت نجکاری نا کنڈآن جاری بیان نا رداٹ ہڑتوم آ وزیر آک توانائی نا بشخ اٹی ہڑتوم آ کنڈآتا کمکاری ءِ سوگو کننگ، زرکاری نا وارخواہی و پاکستان و ترکیہ نا نیام اٹ کمکاری ءِ ودفنگ نا گام گیج آتیا گپ وتران کریر۔ گپ وتران اٹی اسٹریٹجک شریداری نا جاچ ءِ ہلنگ، نجی بشخ انا شریداری ءِ مون آ دننگ و توانائی نا بشخ اٹی اصلاحات و شونداری نا آزموندہ غاتیان فائدہ غاتیا ہم چکار کننگا۔ دااوڑدہی پاکستان و ترکیہ نا نیام اٹ سوگو و برادرانہ تعلقداری نا عکاسی ءِ کرے و داٹی تین پہ تینی منفعت کن اقتصادی و ادارہ جاتی کمکاری ءِ پین گہرا کننگ کن طرفین نا عزم انا درشانی ءِ کننگا۔ وزیراعظم نا سلاہکار توانائی نا بشخ اٹی ترکیہ نا سرسہبی تا ستاءِ کرے و اسیجائی است خواہی نا بشخ آتیٹی کمکاری ءِ ودفنگ اٹ پاکستان نا است خواہی نا درشانی ءِ کرے۔ ہڑتوم آک گپ وتران نا چرجوئی ءِ برجاتخنگ و آخبت اٹ کمکاری نا وارخواہی تے پٹنگ آ امنا کریر۔