بنجائی وزیر بحری امور و گورنر سندھ انا اوڑدہی ، سمندری کچٹی نا چٹفنگ آ کمکاری ءِ ودفنگ آ امنا

اسلام آباد۔ 23 جون (اے پی پی ) بنجائی وزیر بحری امور محمد جنید انوار چوہدری و گورنر سندھ سید محمد نہال ہاشمی سمندری کچٹی نا چٹفنگ و کرکی چاگڑدی نظام نا رکھ اکن بنجائی و صوبائی کہول آ کمکاری ءِ پین سوگو کننگ آ زور شاغانو۔ داخیال آتا درشانی ءِ او قومی اسمبلی ٹی وزیر بحری امور نا چیمبر اٹی مروک آ اوڑدہی ٹی کریر، ہراٹی ہڑتوم آ راہشونک چاگڑدی نظم و نسق و بحری پائیداری کن ادارہ جاتی ہم گرنچی ءِ ودفنگ آ امنا کریر۔ بنجائی وزیرپارے کہ او کراچی نا بروک آ دورہ ٹی میرین پولیو شن کنٹرول بورڈ انا دیوان اس بٹنگک، ہراٹی برجا گام گیج آتا جاچ ءِ ہلنگک و کرکی کچٹی و چاگڑدی انحطاط نا بابت اودے حوال ایترہ۔ گورنرسندھ سید محمد نہال ہاشمی بنجا و صوبہ غاتا نیام اٹ گچین رابطہ کاری نا گرج آ زور شاغسا پارے کہ کچرہ نا گچین بست وبند، سمندری وسیلہ غاتا رکھ و پائیدار زرگزرانی سرجزآتے مون آ دننگ کرکی علاقہ غاتا چاگڑدی و زرگزرانی گچینی کن المی ءِ۔ محمد جنید انوار چوہدری پارے کہ جان جوڑ سمندر موسمیاتی نظام نا توازن، حیاتیاتی تنوع نا رکھ و کرکی آبادی تا روزگار کن بے کچ اہم ءِ، ہرافتے ٹی مینگروز و ماہی گیری نا بشخ اوار ءُ۔ اوپارے کہ کراچی پورٹ ٹرسٹ نا کنڈآن بندرگاہی دِیر و چارمہ کنڈ اٹی معمول نا رداٹ سفائی آپریشن برجاءِ، ہرا چاگڑدی بست وبندی گام گیج آتا بشخ ءِ۔ بنجائی وزیر اقوام متحدہ نا چاگڑدی پروگرام نا حوالہ ءِ ترساپارے کہ مچ آ دنیا ٹی ہرسال کم و ود 19 آن 23 ملین ٹن پلاسٹک کچرا آبی چاگڑداٹی اوار مریک، ہرا سمندری کچٹی نا سنگین جہانی چیلنج نا پیدواری ءِ کیک۔ اومستی پارے کہ جہانی ادارہ شونداری (ورلڈ بینک) تون اوار چندی مطالعات آتا رداٹ سمندری کچرہ ٹی پلاسٹک نا بشخ کیہی علاقہ غاتیٹی 50 درسد آن ہم زیات مریک، دُن تو داکچ ڈیہہ و وڑوڈول نا رداٹ جتا مننگ کیک۔