سیکرٹری زرکاری بورڈ اتون چینی ڈل انا اوڑدہی، پی پاس ڈی پی نا رداٹ توانائی، متبادل توانائی، کشت وکشار ، ماحولیاتی رکھ، صنعتی زون نا شونداری، بحری جہاز آتا تیاری، رئیل اسٹیٹ، واپار، لاجسٹک و جان جوڑی نا ڈٹ آتا بارواٹی پاننگا

اسلام آباد۔ 15فروری (اے پی پی) زرکاری بورڈ انا سیکرٹری اظہر علی چوہدری تون انٹرنیشنل گرین اکنامی ایسوسی ایشن نا چیئرمین ڈینگ ژی ہائے نا سروکی ٹی چین نا 24باسکی ڈل داڑے زرکاری بورڈ اٹی اوڑدہی کریر۔ ڈل ئِ سرکاری بشخ انا شونداری پروگرام نا رداٹ توانائی، متبادل توانائی، کشت وکشار، ماحولیاتی رکھ، صنعتی زون نا شونداری، بحری جہاز آتا تیاری، رئیل اسٹیٹ، واپار، لاجسٹک و جان جوڑی کون آ ڈٹ آتابارواٹی پاننگا۔ ڈینگ ژی ہائے نا دا مسٹ میکو پاکستان نا دورہ ئِ ۔ زرکاری بورڈ انا سیکرٹری تون اوڑدہی ٹی چینی ڈل انا سروک زرکاری بورڈ ، وزارت ڈٹ بندی ، شونداری و اصلاحات و وزارت واپار نا کنڈآن تروک آ معلومداری تیا حکومت پاکستان نا منت واری ئِ ادا کرے۔ اوفک پاریر کہ تینا دورہ ٹی او لاہور، فیصل آباد و کراچی آ ہم کارہ۔ سیکرٹری زرکاری بورڈ چینی ڈل انا دورہ ئِ خوش آئند گوندسا پاکستان اٹی ساڑی زرکاری نا چاگڑد نا بارواٹی معلومداری تس و پاکستان چین نا زرکاری نا اہمیت ئِ خصوصی مون آ تخا۔ چینی ڈل ئِ پاکستان نا زرکاری پالیسی، زرکاری نا کیہی اسکیم بشمول ایکسپورٹ پروسیسنگ زون، مخصوص اقتصادی زون و درملکی زرکار آتے کن بورڈ انا کنڈآن تروک آ آسراتی تا بارواٹی سرجم بریفنگ تننگا۔ زرکاری بورڈ انا سیکرٹری چین نا ڈل ئِ سلاہ پیش کرے کہ او زرکاری بورڈ انا اواری اٹ یا انفرادی وڑاٹ مخصوص اقتصادی زون اڈ تننگ کیک۔ اوداہیت آ زورشاغا کہ سی پیک نا روٹ اتون اوار اوار مخصوص اقتصادی زون تا اڈتننگ آن ملک انا کم شون ہلوک علاقہ غاتا شونداری ٹی کمک تون اوار اوار چین اتون ہڑتوم آ کنڈآتا رابطہ غاتیٹی ہم کمک رسینگک۔ چینی ڈل زرکاری بورڈ انا سلاہ ئِ خوش آئند گوندا و پارے کہ زرکاری بورڈ اتون دا بابت تکنیکی کہول آ مذاکرات کننگک۔ ایسر اٹی زرکاری بورڈ انا سیکرٹری اظہر علی چوہدری انٹرنیشنل گرین اکنامی ایسوسی ایشن نا چیئرمین ڈینگ ژی ہائے ، چینی ڈل و چین نا کنڈآن پاکستان اٹی زرکاری نا بابت کروک آ کوشست آتا ستائِ کرے وپارے کہ زرکاری بورڈ دا چرجوئی ٹی ہروڑنا ممکنہ کمکاری فراوان کننگ کن تیار ئِ۔