اسلام آباد۔ 15 فروری (اے پی پی) دفاعی جاچکار وائس ایڈمرل (ر) احمد تسنیم پارینے کہ پاکستان نا کنڈآن نیول امن مشق آتا میزبانی کننگ اعزاز نا ہیت اسے۔ ریڈیو پاکستان تون ہیت وگپ کرسا اوپارے کہ پاکستان اٹی اڈ تروک آ نیول ”امن“ 17مشق آتیٹی 37ملک آتا شرکت وزیراعظم محمد نواز شریف و آرمی چیف نا کنڈآن مشقت آتا مشاہدہ اعزاز نا ہیت اسے۔ اوپارے کہ دا مشق آتا مسخت سمندر تیٹی منشیات، انسانی اسمگلنگ و دہشت گردی نا چٹفنگ ئِ، دا مشق آتیا ڈیہہ نا غٹ ملک آک خوش ئُ وخت اس کہ بھارت نا پڈ اٹی خل ہلنگ ئِ ۔ اوپارے کہ بھارت ئِ دا سمجھ بفننگ ئِ کہ ہراتم دیر اٹی امن مریک تو واپار ئِ مون آ دننگ رسینگک و اونا فائدہ بھارتئِ ہم ملک انتئے کہ اونا واپاری کچ زیات ئِ۔ دفاعی جاچکار پارے کہ بھارت ئِ فراخ دلی نا درشانی ئِ کرسا انتہاپسندی آن پاناد کروئی مرے۔ اوپارے کہ بھارت دا ڈیہہ آ غلبہ دوئی کننگ خوائک ولے پاکستان نا ساڑی گری ٹی دا مننگ کپک، نریندر مودی نا پالیسی پاکستان ئِ نزور کننگ نا ئِ وخت اس کہ پاکستان بھارت تون اوار ڈیہہ نا غٹ ملک آتون گچین تعلقداری نا خواہندارئِ۔ پاک چین اقتصادی راہداری ڈٹ انا بابت اوپارے کہ دا ڈٹ انا پوروی آن پاکستان و ڈیہہ ٹی شونہالی بریک و اونا فائدہ بھارت ئِ ہم رسینگک ہنداخاطران بایدے اودے مرے کہ او تینا رویہ ٹی مثبت بدلی اتسا پڑوسی ملک آتون گچین تعلقداری تے استوار کے۔
