کوئٹہ۔ 14 فروری (اے پی پی) پاکستان مسلم لیگ (ن) نا راہشون باسک صوبائی اسمبلی میر غلام دستگیر بادینی پارینے کہ پاک چین سنگتی تاریخی و ڈیہہ ٹی اہمیت تخک، مسلم لیگ (ن) نا حکومت عملی گام گیج کننگ ئِ ، وزیراعظم پاکستان میاں محمد نواز شریف ملک ئِ دوارہ ایشیانا ٹائیگر جوڑ کرینے، میگا پروجیکٹ نا پوروی آن ملک ترقی یافتہ ملک آتیٹی اوار مریک، سی پیک نا سرسہبی آن صوبہ ٹی شونداری نا پوسکن آ دور انا بناءمریک ، صوبہ آن پسماندگی و نیزگاری ٹی کمتی اتنگ کن کیہی علاقہ غاتیٹی اجتماعی شونداری ڈٹ آتیا کاریم برجاہ ئِ۔ وزیراعلیٰ بلوچستان نواب ثناءاللہ خان زہری بلوچستان نا شونداری کن خصوصی چکار تخنگئِ۔ نوشکی ئِ صاف دیر انا فراوانی المی جوڑ کننگ انگ ئِ۔ داخیال آتا درشانی ئِ او ”اے پی پی“ تون ہیت وگپ کرسا پارے۔ اوپارے کہ وزیراعلیٰ بلوچستان نواب ثناءاللہ خان زہری بلوچستان ئِ شونداری نا اسہ پوسکن ئُ کسر اسے آ روان کننگ ئِ۔ اوپارے کہ بلوچستان اٹی شونداری کاریم تا جال اس شاغنگانے۔ ہراڑآن بلوچستان اٹی خننگوک آ احساس محرومی ئِ چٹفنگ کن تینا غٹ وسیلہ غاتے کاریم اٹ اتیک، اوپارے کہ نوشکی ٹی کروڑ آ روپئی نا خڑچ آن شونداری کاریمک برجاہ ئُ، مر مر انگا علاقہ غاتا الس ئِ زند انا بنداوی آسراتی فراوان کننگ کن بنجائی وصوبائی حکومت آک پبی گام گیج کننگ ئُ، باسک صوبائی اسمبلی مستی پارے کہ آب نوشی، تعلیم، جان جوڑی ، روڈ آتا جوڑ جاڑتون اوار ایلو ڈٹ آتیا کروڑ آ روپئی نا خڑچ آن کاریم ترندی اٹ برجاہ ئِ ، اوپارے کہ ننا منشور الس نا شرحالی ئِ۔
