اسلام آباد۔ 13 فروری (اے پی پی) پاکستان اسٹاک ایکسچینج (پی ایس ایکس) دنیا نا 5می گچین اسٹاک مارکیٹ جوڑ مسنے۔ پاکستان اٹی امن وایمنی نا حالیت آتیٹی گچینی آن معاشی شونداری و جمہوریت نا سوگوی ٹی کمک رسینگانے وخت اس کہ نیزگاری ٹی کمتی آن متوسط تپہ غاتا کچ اٹی ودکی مننگ ئِ۔ وال اسٹریٹ جنرل نا رپورٹ نا رداٹ پاکستان اسٹاک ایکسچینج اٹی ہندی و پیشن نا زرکاری 100 ارب ڈالر اسکان رسینگانے۔ پی ایس ایکس 50 ہزار انڈیکس نا ریکارڈحد ئِ عبور کرینے۔ رپورٹ نا رداٹ پی ایس ایکس دنیا نا پنچ می بھلااسٹاک مارکیٹ جوڑ مسنے۔ داوڑ پاکستان نا جی ڈی پی گروتھ گدرینگوک آ 8 سال انا بڑزکو انگا کہول پنچ درسد آن ودانے وخت اس کہ اینخو نا سال شرح نمو ٹی 5.4درسد نا ودکی گمانی ئِ ۔ وال اسٹریٹ جنرل نا رداٹ سی پیک ، بنداوی ڈھانچہ و توانائی نا بھلا ڈٹ آتا سوب پاکستان نا معاشی شونداری ٹی نمان ودکی مسنے۔ پیشن نا ملک رہینگوک پاکستانی تا معاشی شونداری ٹی نمان ودکی مسنے۔ پیشن نا ملک رہینگوک پاکستانی تا کنڈآن گدریفوک آ ترسیلات زر انا کچ 20 ارب ڈالر اسکان ودانے ہرانا سوب لس بندغ نا قوت خرید اٹی ودکی مسنے۔ سوئٹزر لینڈ نا پنی کمپنی نا چیف ایگزیکٹو برونو اولیز ہوک تینا اسہ بیان اسے ٹی پارینے کہ پاکستان اٹی متوسط تپہ غاتا کچ اٹی ودکی نا سوب گدرینگوک آ پنچ سال اٹی کمپنی نا سیلز اٹی دوگناودکی مننگ آن اونا کچ اسہ ارب ڈالر سالانہ اسکان ودانے۔ اوپارے کہ دنیا نا ایلو ملک آتا مقابلہ ٹی پاکستان اٹی معاشی شونداری و سیاسی سوگوی نا سوب مڈل کلاس اٹی دے پہ دے ودکی مننگ ئِ۔
