وزیراعظم عمران خان تون ہواوے نا سپروائزری بورڈ انا چیئرمین نا ڈل اتون اوار اوڑدہی

اسلام آباد ۔ 07 نومبر (اے پی پی) وزیراعظم عمران خان تون ہواوے نا سپر وائزری بورڈ انا چیئرمین لی جی ڈل اتون اوار پنچ شنبے نادے آ وزیراعظم آفس اٹی اوڑدہی کرے ۔ زرکاری بورڈ انا چیئرمین سید زبیر حیدر گیلانی ، سیکرٹری واپار سردار احمد نواز سکھیرا، سیکرٹری آئی ٹی شعیب احمد صدیقی ئسک ہم داوخت آ ساڑی ئسر ۔ ہواوے سپر وائزری بورڈ انا چیئرمین وزیراعظم ءِ تینا کمپنی نا نیٹ ورک انا ودفنگ و شونداری نا بابت وزیراعظم ءِ معلومدار کرے ۔ اوپارے کہ اونا کمپنی اسہ پوسکن ءُ ایکو سسٹم اس سرسہبی اٹ جوڑ کرینے تانکہ دا بشخ اٹی ہراکمپنی تا اجارہ داری ءِ ، اوفتیا انحصار آن آزاد تہو ہننگ کے ۔ وزیراعظم عمران خان وزارت واپار نا کنڈآن پوسکن آ ای ۔ پالیسی نا رداٹ ودی مروک آ کاروبار نا گیشتر وارخواہی تا بارواٹ ہیت کرسا کمپنی ءِ دا بشخ اٹی کاروبار نا وارخواہی پٹنگ نا سلہ خلک ۔ اوپاکستان نا ذہین ورناتے تکنیکی بشخ آتے ٹی کاریم کننگ نا وارخواہی فراوان کننگ آ ہم زور شاغا ۔ اوڑدہی ٹی کمپنی نا مینو فیکچرنگ یونٹس پاکستان آ گدریفنگ نا گمان آتیا ہم گپ و تران کننگا ۔ وزیراعظم عمران خان حکومت نا کنڈآن ممکنہ وڑاٹ تینا صنعت آتے پاکستان آ گدریفوک آ کمپنی تیکن است چکوک مراعاتی پیکج ءِ تالان کرسا پاکستان اٹی اڑزان لیبر، باصلاحیت و قابل پاکستانی ورناتا دستیابی نا ہم ذکر ءِ کرے وپارے کہ درملکی کمپنیک تینا کاروبار ءِ تالان کننگ کن داڑان فائدہ ہرفنگ کیرہ ۔ آئی ٹی نا بشخ ڈیجیٹل پاکستان مہم اسے نا بناءِ کرینے و دانارداٹ ورناتا لاءخی تیان فائدہ ہرفنگ مریک و کمپنیک ہم داڑان فائدہ ہرفنگ کیرہ ۔ وزیراعظم پارے کہ درآمدی متبادل نا فراوانی ٹی اوفتا مہارت و نسٹ و جی آئی کے نا طالب علم آتا کمک اٹ بناکروک آ تکنیکی آٹومیشن آپریشن ءِ مون آ دننگ اٹ بھاز کمک رسینگک ۔ ہواوے سپر وائزری بورڈ انا چیئرمین لی جی پارے کہ او پاکستانی طالب علم آتا ذہنی لاءخی و قابلیت آن بھاز زہمی ءُ ۔ اوپارے کہ اوفتا کمپنی نمل نا طالب علم آتے میرٹ ایوارڈ تننگ نا پروگرام نا بناءِ کرینے ۔