وزیراعظم نا کماشی ٹی صوبہ پنجاب اٹی سرکاری ڈغار تے آسودہی و السی مسخت آتے کن کاریم اٹ اتنگ نا بابت دیوان سرجم حوال ہلک

اسلام آباد ۔ 07نومبر (اے پی پی) وزیراعظم عمران خان نا کماشی ٹی صوبہ پنجاب اٹی سرکاری ڈغار تے آسودہی مسخت آتے کن کاریم اٹ اتنگ خاص کر پنجاب ءِ آپریٹو بورڈ فار لیکوڈیشن نا زیر انتظام ماڑی تے السی مسخت آتے کن کاریم اٹ اتنگ نا بابت دیوان اس اڈ ہلک ۔ پنچ شنبے نادے آ وزیراعظم میڈیا آفس آن جاری کروک بیان نا رداٹ دیوان اٹی وزیر کانود ڈاکٹر فروغ نسیم، وزیراعلیٰ پنجاب سردار عثمان بزدار، صوبائی وزیر کوآپریٹیو مہر محمد اسلم بھروانہ، وزیر کانود پنجاب محمد بشارت راجہ، چیف سیکرٹری پنجاب یوسف نسیم کھوکھر و ایلو سینئر آفیسر آک ساڑی ئسر ۔ وزیراعظم ءِ صوبہ پنجاب اٹی سرکاری ماڑی تے السی راجی آسراتی کن کاریم اٹ اتنگ آ سرجم حوال تننگا ۔ چیئرپرسن پنجاب کوآپریٹیو بورڈ لیکوڈیشن (پی سی بی ایل) بشری امان ادارہ نا ملکیت اٹی چندی ماڑی تا بارواٹی وزیراعظم ءِ پارے کہ پی سی بی ایل نا ملکیت اٹی 293ماڑی ءُ ہرافتیان کشاری، کمرشل و ہنکینی میرات آتیا تالان 98 ماڑی نیلامی کن دمدستی وڑاٹ میسر ءُ ۔ اوفتا مالیت کھرب آ روپئی ءِ ۔ ایلو ماڑی تا بابت مقدمہ غاک چندی عدالت آتے ٹی زیر سماعت ءُ ۔ وزیراعظم ءِ پاننگاکہ پی سی بی ایل نا پوسکن آ انتظامیہ تدوک آ شش تُو اٹی ارب آ روپئی نا ماڑی تے ناروا کوزہ غان واگزار کرفینے ۔ وزیراعظم دیوان آن تران کرسا پارے کہ اسہ ہندن ءُ ملک اسے ٹی ہراڑے زرگزران و وسیلہ غاتا بھلا بشخ پیشن نا وام تا ادائیگی تیٹی خڑچ مرے ہموڑے مستین اٹی سرکاری ماڑی تے گچین وڑاٹ کاریم اٹ اتپننگ مجرمانہ ڈیوالائی ئس ۔ اوپارے کہ ساڑی حکومت بطور پالیسی سرکاری ماڑی (ڈیڈ ایسٹ) ءِ السی راجی آسراتی کن کاریم اٹ اتنگ کن پرعزم ءِ و دافتیان مروک آ کٹیا ءِ معاشی عمل ءِ ترند کننگ و نوکری تا وارخواہی ودی کننگ کن صرف کننگک ۔ وزیراعظم پی سی بی ایل انتظامیہ و وزیر کانود پنجاب ءِ پارت کرے کہ ادارہ نا ماڑی تیان تعلقدار مقدمہ غاتا زوت فیصلہ غاتے کن کوشست آتے ترند کننگے و دارداٹ غٹ المی گام گیج کننگے ۔ وزیراعظم پارے کہ ساڑی حکومت مشکل انگا حالیت آتے ٹی حکومت ءِ سنبھالا، زرگزران نا گچینی کن مشکل فیصلہ کننگ المی ئس ولے دا گام گیج آتا مثبت بھرم دوئی مننگ بناکرینے و اینو ملک انا زرگزران اٹی سوگوی بسنے ۔ اوپارے کہ الس ءِ ریلیف فراوان کننگ، معاشی عمل ءِ ترند کننگ و خاص کر ورناتے کن نوکری تا وارخواہی ودی کننگ کن کوشست آتے پین ترند کروئی مریک ۔