پاکستان سوءٹزر لینڈ اتون تعلقداری تے بے کچ قدر انا نظر اٹ ہرک ، کثیر الجہتی بشخ آتے ٹی تعلقداری تے پین ودفنگ نا سخت گرج ءِ، محمد صادق سنجرانی
اسلام آباد ۔ 07 نومبر (اے پی پی) چیئرمین سینیٹ صاد ق سنجرانی پارینے کہ پاکستان سوءٹزر لینڈ اتون تینا ہڑتوم آ کنڈآتا تعلقداری تے بے کچ قدر انا نظر اٹ ہرک ، دا تعلقداری تے کثیر الجہتی بشخ آتے ٹی پین ودفنگ نا سخت گرج ءِ، پاکستان و سوءٹزر لینڈ اسہ ایلو نا آزموندہ غاتیان بھاز گڑا ہیل کننگ کیرہ و ادارہ جاتی کمکاری و پارلیمانی ڈل آتا ہن و بر آن رابطہ کاری ءِ پین گچین کننگ مریک، سوءٹزر لینڈ انا پارلیمانی ڈل انا دورہ نا زوت مثبت بھرم مون آ بریک ۔ داخیال آتا درشانی ءِ چیئرمین سینیٹ محمد صادق سنجرانی سوءٹزر لینڈ انا ریاست آتا کونسل نا صدر جین رینے فرنیئر نا کماشی ٹی پاکستان نا مسہ دے ئی دورہ ءِ کروک آ پارلیمانی ڈل اتون پارلیمنٹ ہاءوس اٹی اوڑدہی ٹی کرے ۔ چیئرمین سینیٹ صادق سنجرانی پارے کہ سوءٹزر لینڈ انا زرکارآک پاکستان اٹی زرکاری نا وارخواہی تیان پبی فائدہ ہرفنگ کیرہ ۔ پاکستان زرکاری کن جوان ءُ ملک اسے و آخبت اٹ گوادر واپار و زرکاری نا معاشی حب ثابت مریک ۔ گوادر پاکستان ءِ ڈیہہ نا واپاری مرکز اس جوڑ کننگ نا لاءخی تخک ہراڑان سوءٹزرلینڈ بایدے فائدہ ہرفے ۔ اوپارے کہ پاکستان گوادر نا کمک اٹ ڈیہہ تون رابطہ کاری ءِ مون آ درسا نئے بیرہ تینکن بلکن ڈیہہ نا ملک آتا شونداری ٹی اہم کمکار مریک ۔ محمد صادق سنجرانی پارے کہ پاکستان ڈیہہ ٹی امن نا خواہندار ءِ و داڑکن ملکی و جہانی اہم فورم آتیا گام گیج ہم چست کننگ انگ ءِ ۔ پاکستان اوغان امن عمل نا مخ تفی ءِ برجاتخک و اوغانستان اٹی امن پاکستان نا فائدہ ٹی ءِ ۔ چیئرمین سینیٹ محمد صادق سنجرانی سوءٹزر لینڈ نا ڈل اتون مقبوضہ کشمیرنا ساڑی حالیت آتا بارواٹ سرجم گپ و تران کرسا پارے کہ پاکستان کشمیرنا ویل انا ایسری ءِ اقوام متحدہ نا قرارداد و کشمیر ی تا است خواہی نا رداٹ خواہک ۔ جہانی برادری ءِ کشمیری تا حق خودارادیت نا دوئی کننگ کن گچین کڑد ادا کروئی مریک ۔ سوءٹزرلینڈ انا ریاست آتا کونسل نا صدر جین رینے فرنیئر چیئرمین سینیٹ نا خیال آتیان امنا کرسا پارے کہ ادارہ جاتی کمکاری و پارلیمانی ڈل آتا ہن و بر آن تعلقداری تے پین سوگو کننگ مریک ۔ پاکستان نا دورہ ءِ کرسا ننے خوشی محسوس مننگ ءِ ۔ اوپارے کہ پارلیمانی سفارتکاری رابطہ غاتے مون آ دننگ اٹ بے کچ اہمیت تخک و ننا دورہ نا مسخت ہی پارلیمانی رابطہ و ہڑتوم آ کنڈآتا کمکاری ءِ مون آ دننگ نا ءِ ۔ ہڑتوم آ ملک آک اسہ ایلو نا آزموندہ غاتیان پبی فائدہ دوئی کننگ کیرہ ۔ ننا است خواہی ءِ کہ پارلیمانی ، واپاری و اقتصادی کمکاری ءِ پین مون آ دننگے ۔ اوکان پد سوءٹزر لینڈ نا پارلیمانی ڈل ڈپٹی چیئرمین سینیٹ سینیٹر سلیم مانڈوی ولا تون پارلیمنٹ ہاءوس اٹی اوڑدہی کریر و تین پہ تینی است خواہی نا معاملہ غاتیا سرجم گپ و تران کریر ۔ ڈپٹی چیئرمین سینیٹ سینیٹر سلیم مانڈوی والا پارے کہ پاکستان سوءٹزر لینڈ نا تعلقداری تا تاریخ نا اینو پوسکن آ باب اس نوشتہ مسنے ۔ سوءٹزر لینڈ نا پارلیمانی ڈل انا پاکستان اٹی دا اولیکو دورہ بے کچ ستاکڑزک ۔ ہڑتوم آ ملک آک دا تعلقداری تے پوسکن آ بڑزی تسکان دننگ نا خواہندار ءُ ۔ اوپارے کہ ادارہ جاتی کمکاری و کانود ساز ادارہ غاتا نیام اٹ سوگو رابطہ تعلقداری تے پین مون آ دننگ کینہ و پارلیمانی ڈل آتا گپ و تران و واپاری کہول آ رابطہ غاتا مون آ دننگ کن بھلو گنجائش ساڑی ءِ ۔ ہڑتوم آ راہشون تا نیام اٹ مروک آ اوڑدہی ٹی حکومت ، پارلیمانی و آئین ساز ادارہ غاتا کاریم نا وڑوڈل آتیا ہم سرجم گپ و تران کننگا و پارلیمانی فرینڈ شپ گروپس ءِ پین گچین کننگ آ امنا ہم کننگا ۔ داوخت آ پاکستان سوءٹزر لینڈ سنگتی پڑک نا کنوینئر سینٹر فاروق ایچ نائیک و گروپ نا باسک آک ہم ساڑی ئسر ۔ چیئرمین سینیٹ محمد صادق سنجرانی پاکستان نا دورہ ءِ کروک آ سوءٹزر لینڈ نا پارلیمانی ڈل انا شرف اٹی دے انا اِرغ اس تس ہراٹی ڈپٹی چیئرمین سینیٹ سلیم مانڈوی والا، قائد ایوان سینیٹ سینیٹر سید شبلی فراز، قائد حزب اختلاف سینیٹ سینیٹر راجہ محمد ظفر الحق و سیکرٹری سینیٹ محمد انور ئسک ہم ساڑی ئسر ۔
