اسلام آباد ۔ 07 نومبر (اے پی پی) وزیر خارجہ مخدوم شاہ محمود قریشی پارینے کہ پاکستان و سنگاپور نا نیام اٹ تین پہ تینی کمکاری ءِ پین ودفنگ نا گرج ءِ ۔ داہیت ءِ او پنچ شنبے نادے آ سنگاپور اٹی پاکستانی ہائی کمیشن نا دورہ نا وخت آ پارے ۔ سنگاپور اٹی تعینات پاکستانی ہائی کمشنر رخسانہ افضال و ہائی کمیشن نا سینئر کمامدارآک وزیرخارجہ ءِ بخیر کریر ۔ سنگاپور اٹی تعینات پاکستانی ہائی کمشنر پاکستان و سنگاپور نا نیام اٹ ہڑتوم آ کنڈآتا تعلقداری تا وڑ و واپار نا کچ اٹی ودکی تون اوار چندی بشخ آتے ٹی ہڑتوم آ کنڈآتا کمکاری ءِ مون آ دننگ نا بابت وزیر خارجہ ءِ سرجم حوال تس ۔ وزیر خارجہ پاکستان و سنگاپور نا نیام اٹ ہڑتوم آ کنڈآتا تعلقداری تا وڑ آ است جمی نا درشانی ءِ کرسا پارے کہ پاکستان و سنگاپور نا نیام اٹ تین پہ تینی کمکاری ءِ پین ودفنگ نا گرج ءِ ۔ وزیر خارجہ پارے کہ ٹیکنالوجی ، تعمیرات ، صنعت و کشت وکشار تون اوار کثیر الجہتی بشخ آتے ٹی ہڑتوم آ کنڈآتا کمکاری ءِ ودفنگ کن گام گیج کروئی مریک ۔ اوپارت کرے کہ سنگاپور اٹی رہینگوک آ پاکستانی تا راجی آسراتی و اوفتے مون تروک ویل آتے اولیتی بنداو تیا ایسر کننگ کن گام گیج کننگے ۔
