اسلام آباد ۔ 07 نومبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان نا حکومت ریاست مدینہ نا نمونہ غا عمل کننگ ءِ، پاکستان ، ترکی و ملائیشیا اسیجا ٹی وی چینل اس جوڑ کیرہ، ٹی وی چینل نا جوڑ کننگ نا مسخت دنیا ءِ حقی اسلام نا دروشم آن روشناس کرفوئی ءِ، رسول پاک ﷺ تون والہانہ مہرو مریبت و عقیدت ننا ایمان نا بنداوی جزو ءِ، اسلام اسہ زند انا اسہ گچین ءُ نظام اسے ہرانا مسخت انسانیت نا آسودہی ءِ، سیرت پاک آ عمل کرسا ہی دنیا و آخرت نا سرسہبی ممکن ءِ ۔ او ریڈیو پاکستان و پاکستان ٹیلی ویژن نا اواری اٹ عید میلاد النبی ﷺ نا چرجوئی ٹی کل پاکستان نعتیہ مقابلہ غاتے ٹی نمان پوزیشن ہلوک آ نعت خوان آتے ٹی انعام بشخنگ نا دود آن تران کریکہ ۔ بنجائی وزیر مذہبی امور نور الحق قادری و ریڈیو پاکستان نا ڈائریکٹر جنرل ثمینہ وقار ہم دود اٹی ساڑی ئسر ۔ نعتیہ مقابلہ ٹی ہر چار آ صوبہ ، بنجائی دارالحکومت گلگت بلتستان و آزاد کشمیر آن نعت خواں شریک ئسر ۔ دا نعت خوان آک صوبائی کہول آ مروک آ نعتیہ مقابلہ غاتے کٹنگ آن پد دا سالانہ نعتیہ مقابلہ کن کوالیفائی کرینو ۔ دا مقابلہ چار کیٹیگری تیٹی مس ہرافتے ٹی پانزدہ سال اسکان نا مارک ، پانزدہ سال اسکان نا مسنک ، پانزدہ آن بیست و پنچ سال اسکان نا مار ک و پانزدہ آن بیست و پنچ سال اسکان نا مسن تا مقابلہ غاک اوارءُ ۔ نعتیہ مقابلہ ٹی پوزیشن ہلوک آتے نغد انعام و سند تننگا ۔ محفل میلاد النبی ﷺ نا دود آن تران کرسا وزیراعظم نا خصوصی کمکار ڈاکٹر فردوس عاشق اعوان پارے کہ دنیا و آخرت اٹی سرسہبی کن دُن انگا محفل آتا اڈ تننگ المی ءِ ۔ دُن انگامحفل آک اسہ ایلو ءِ خڑک اتنگ نا گچین ءُ ذریعہ سے ۔ اوپارے کہ خواجہ محمد ﷺ نا ذات مبارک اسلام نا آفاقی کلہو نا عملی نمونہ اسے، اسلام اسہ گچین ءُ زند انا نظام اسے ہرانا مسخت انسانیت نا فلاح ءِ ۔ اومحفل میلاد نا اڈتننگ آ ریڈیو پاکستان و پاکستان ٹیلی ویژن نا کوشست آتا ستاءِ کرسا پارے کہ ہڑتوم آ ادارہ غاک مدام ریاست نا نظریاتی سیم تا رکھ انا فرض ءِ سرانجام تسنو ۔
