ایل او سی نا دورہ نا سلہ غا بھارت نا چپی آن بھارتی آرمی چیف انا دروغ ثابت مس، ترجمان دفترخارجہ

اسلام آباد ۔ 22اکتوبر (اے پی پی) پاکستان اٹی تعینات درملکی سفیر آک و ہائی کمشنر آتے سے شنبے نادے آ کنٹرول لین نا نوسہری ، شاہ کوٹ و جوڑاسیکٹر آتا دورہ ءِ کرفنگا ، دا دورہ ٹی درملکی سفیر آتے بھارتی آرمی چیف نا ایل اوسی آ مبینہ کیمپ آتا بھس کننگ نا دروغ انا دعویٰ ءِ دنیا نا مون آ پاش کننگا ۔ وزارت خارجہ نا ڈائریکٹر جنرل سویلی ایشیا و سارک ڈاکٹر محمد فیصل ہم درملکی سفیر آتون اوار ئس ۔ بھارتی ناظم الامور گورروواہلو والیا ءِ ہم ایل او سی نا دورہ نا سلہ خلنگاسس ولے بھارتی حکومت یا ہائی کمیشن سلہ غا ہچ ءُ ورندی اس تتوس و خاموشی اختیار کریر ہراڑان بھارتی آرمی چیف نا دروغ ثابت مس ۔ پاکستان اٹی متعین بھارتی ناظم الامور گورواہلووالیا ایل او سی نا دورہ غا ہنتو ۔ وزارت خارجہ نا ڈی جی سویلی ایشیا و سارک ڈاکٹرمحمد فیصل ہرا درملکی سفیر آتون اوار ئس، اوکان پد تینا ٹویٹ اٹی پارے کہ بھارتی آرمی چیف نا دعویٰ ، دعویٰ اس سلیس، بھارت نا ہچ ءُ سفارتکاراس ایل او سی نا دورہ غا نن تون بتو ۔ اوپارے کہ بھارت دعویٰ کردہ لانچنگ پیڈز انا کوآرڈینیٹس اس ہم فراوان کتو ۔ ترجمان پارے کہ درملکی سفیرآک، ہائی کمشنر آتے ایل او سی نا نوسہری ، شاہ کوٹ و جوڑاسیکٹر آتیا دننگا ۔ ترجمان پارے کہ بھارتی فورس آک 19 و 20 اکتوبر آ ایل او سی آ شاری آبادی بھلو توپخانہ سے تون نشانہ کریسر ۔ دا اشتعال انگیزی ٹی اسہ فوجی ورنا اسے تون اوار 6شاری شہید مسر ۔ یات سلے کہ بھارتی آرمی چیف جنرل بپن راوت مبینہ وڑاٹ 3دہشت گرد کیمپ آتے بھس کننگ نا دروغ انا دعویٰ کریسس وخت اس کہ پاکستان بھارتی آرمی چیف نا بیان ءِ مسترد کرسا بھارت ءِ دعویٰ سچ ثابت کننگ نا کھلا چیلنج تسوسس ۔