کوالٹی ءِ وانگ ءُ زانگ ءُ ورنا آنی واستہ موہ آنی تہ ءَ گیشی ءِ واستہ وانینگ ءِ شوبگ ءِ مھکم کنگ المی اِنت۔ استادانی جھان ءِ روچ ءِ درگت ءَ صدر آصف علی زرداری ءِ کلوہ

اسلام آباد۔5اکتوبر  (اے پی پی): صدر ءِ مملکت آصف علی زرداری ءَ گوشت کہ جوانیں وانگ ءُ زانگ ءُ ورنا آنی واستہ موہ آنی تہ ءَ گیشی ءِ واستہ ٹیچنگ ءِ شوبگ ءِ مھکم کنگ المی اِنت۔ انوگیں دور ءِ لوٹ آنی رد ءَ استاد آنی وانگ ءُ زانگ، پیشہ وارانہ دیمروئی ءُ حمایتی وانینگ ءِ چاگرد ءَ مدام سرمایہ کاری کنگ لوٹ ایت۔ استاد ءُ نودربر ءِ نیام ءَ بنیاتی سیادی ءَ برجاہ دارگ ءِ وھد ءَ استاداں نوکیں ٹیکنالوجی ءِ کارمرز کنگ ءِ ھاترا کمک کنگ بہ بیت۔ آئی ءَ اے گپ 5اکتوبر ءَ پاکستان ءَ ھوار سرجمیں دگنیا ءَ برجم دارگ بوھوکیں جھان ءِ استاد آنی روچ ءِ موہ ءَ وتی کلوہ ءِ تہ ءَ گوشت۔صدر ءِ مملکت آصف علی زرداری ءَ پاکستان ءَ ھوار سرجمیں دگنیا ءِ استاد آناں اے روچ ءَ مبارک بات دات ءُ وانگ ءُ زانگ، انسانی دیمروئی ءُ راجی جوڑیشت ءِ تہ ءَ آوانی ارزشتی ایں ازمت آناں شرپ مند کت۔ آئی ءَ گوشت کہ استاد ھرچ وانگ ءُ زانگ ءِ نظام ءِ مرکز ءُ محور اَنت، آ زانت ءِ پھجارینگ ءِ گوما نودربر آنی تہ ءَ پٹ ءُ پول ءُ جست ءُ پرس ءِ دیمروئی ءَ کن اَنت، کردار جوڑ کن اَنت ءُ ورنا آناں چاگرد ءِ ذمہ وار ءُ پیداواری باسک جوڑ بوھگ ءِ واستہ المی ئیں مہارت ءُ قدر ءُ قیمت آناں آشنا کن اَنت۔ آئی ءَ گوشت کہ استاد آنی اثر ءُ رسوخ ءُ کرد کلاس روم ءَ چہ گیش انت ءُ ایشی ءِ اثرات ھاندان ءُ چاگرد آنی زندمان ءَ گندگ بنت۔ آئی ءَ گوشت کہ اے سال ءَ استاد آنی جھان ءِ روچ ءِ ارزشت ھم گیش بوتگ پرچا کہ اے روچ 1966 ءَ آئی ایل او یونیسکو ءِ ’’استاد آنی بستار‘‘ ءِ ھوالگ ءَ سفارش ءِ شستمی سالروچ ءِ موہ ءَ برجم دارگ بوھگ ءَ اِنت۔ اے سال ءِ بنگپ ”استادانی گوما اوشتگ: 60 سال ءِ واستہ پیشہ ءِ رکھینگ، آہانی بستار ءَ دیم ءَ برگ ءُ مئے آیوکیں وھد ءِ جوڑ کنگ“ ءِ تہا استادانی اهمیت ءِ شناخت ءُ آہاں پیشہ وارانہ کمک ءُ موہ ءِ رسگ ءِ ضلورت ءِ سرا چمشانک دیگ بوتگ۔ صدر ئِ مملکت ئَ گوشت کہ پاکستان ئَ وانگ ءُ زانگ ئِ کوالٹی ئِ تہ ئَ گہتر کنگ ءُ زھگ ءُ ورنا آنی واستہ موہ آناں گیش کنگ ئِ واستہ درس ئِ شوبگ ئِ مھکم کنگ المی اِنت۔ ما استاد ءِ وانگ ءُ زانگ، پیشہ وارانہ دیمروئی ءُ حمایتی وانگ ءِ چاگرد ءِ تہا سرمایہ کاری ءَ برجاہ دارگی اِنت دانکہ آ وتی نودربر ءِ بدل بوؤکیں وانگ ءُ زانگ ءِ لوٹاں پیلو کنگ ءِ ھاترا شرتر تیار بہ بنت۔ آئی ءَ گوشت کہ مصنوعی ذہانت ءَ ھوار ٹیکنالوجی ءِ ترندیں دیمروئی ءَ چہ وانگ ءُ زانگ ءِ پجارینگ ءِ راہ ھم بدل بوھگ ءَ انت۔ ٹیکنالوجی وانینگ ءُ زانگ ءِ عمل ءِ تہا کمک بوت کنت بلے اے ہما انسانی صفاتانی بدل ءَ بوت نہ کنت کہ استاد کلاس روم ءَ آرگ ءَ انت، ایشانی تہا ہمدردی، رہشونی، اخلاقی تربیت ءُ نودربراں سرپد بوہگ ءُ اثر مند بوہگ ءِ توانائی ہوار انت۔ آئی ءَ اے گپ ءِ سر ءَ زور پر دات کہ استاد آناں نوکیں ٹیکنالوجی آنی کارمردی ءِ تہ ءَ کمک کنگ بہ بیت ءُ استاد ءُ نودربر ءِ نیام ءَ انسانی سیادی ءَ را وانگ ءُ زانگ ءِ محور ءِ بستار ءَ برجم دارگ بہ بیت۔ صدر مملکت ءَ ھاسیں رنگ ءَ دوریں، نزوریں ءُ مشکلیں دمگ آنی تہ ءَ خدمت کنوکیں استاد آناں توسیپ کت ءُ گوشت کہ بازیں زھگ آنی واستہ کوالٹی ءِ وانگ ءُ زانگ ءِ مستریں رنگ ءَ آوانی اسکول ءِ استاد ءِ محنت ءُ عزم ءِ سر ءَ بندوک اِنت۔ اے وڑیں استادانی واستہ المی ئیں تربیت، وسیلگ ءُ سازگاریں کار ءِ جاور ھال آنی رسگ ءَ را دل یکیمی کنگ المی اِنت کہ ھر زھگ ءَ را وانگ ءُ دیمروئی ءِ منصفانہ موہ دیگ بہ بیت۔ صدر ءِ مملکت ءَ اے موہ ءِ سر ءَ حکومت، وانگ ءُ زانگ ءِ ادارگ، والدین، کمیونٹی، سول سوسائٹی ءُ پرائیویٹ سیکٹر ءَ را زور پر دات کہ آ یکجائی ءَ استادی پیشہ ءَ را مھکم کنگ ءُ ایشی ءِ وقار ءَ را گیش کنگ ءِ واستہ کار بہ کن اَنت۔ آئی ءَ گوشت کہ استاد آنی کمک کنگ پاکستان ءِ وانگ ءُ زانگ ءُ آیوکیں باندات ءِ واستہ سرمایہ کاری انت۔ صدر ءِ مملکت ءَ توامیں پاکستانی استاد آناں وتی لگن، صبر، مھکم ءُ ازمت ءِ سر ءَ شگر ءُ منت گپت ءُ گوشت کہ آھانی محنت ءُ کوشست نسل آنی زانت، کردار ءُ واھشت آناں جوڑ کنت کہ مئے ملک ءِ آیوکیں باندات ءَ را جوڑ کنت۔