وزیراعظم عمران خان نا چائنہ حب پاور جنریشن پلانٹ نا بنائی دود آن تران

حب ۔ 21اکتوبر (اے پی پی) وزیراعظم عمران خان سی پیک نا رداٹ پاکستان و چین نا اولیکو اسیجا پاور پلانٹ نا ڈٹ ءِ ملک اکن ستاکڑزوک گوندسا پارینے کہ چین پاکستان اقتصادی راہداری پاکستان کن بھلو موقع اسے و نن داڑا مون آ ہِننگ اُن، بجلی نا ڈٹ آتے ٹی ایندھن نا ہندی ذریعہ غان بایدے فائدہ ہرفنگے، ساڑی حکومت نا شفافیت و گڈ گورننس نا سوب درملکی کمپنیک پاکستان اٹی زرکاری کننگ کن آمادہ ءُ ، کاروبار اٹی آسانی کن غٹ ممکنہ گام گیج کننگک، چین ماہی پروری و کشاری بشخ آتے ٹی ہم زرکاری کننگ خواہک ، ننے تینا ورناتے پوسکن آ کسب و تربیت ترسا میرات جوڑ کروئی ءِ ہرا ملک ءِ مون آ دیرہ ۔ داخیال آتا درشانی ءِ او دوشنبے نادے آ 1320 میگاواٹ پیدواری لاءخی نا چائنہ حب پاور جنریشن پلانٹ نا بنائی دود آن تران کرسا کرے ۔ وزیراعلیٰ بلوچستان جام کمال خان ، بنجائی وزیر بحری امور علی حیدر زیدی وپاکستان اٹی چین نا سفیر یاءوجنگ ئسک ہم داوخت آ ساڑی ئسر ۔ ۔ داکان مست وزیراعظم سی پیک نا رداٹ اولیکو اسیجا چائنہ حب پاور جنریشن پلانٹ نا بناءِ کرے ۔ دود آن تران کرسا وزیراعظم پارے کہ حب پاور جنریشن پلانٹ نا بنا آ خوشی ءِ ، سی پیک نا رداٹ دا اولیکو اسیجائی ڈٹ ءِ ، دا چرجوئی ءِ نن مون آ دننگ خوانہ ۔ اوپارے کہ چین نا بھلا کمپنیک پاکستان اٹی زرکاری کن بننگ نا خواہندار ءُ ۔ پاکستان نا کاروبار ، صنعت و ایس ایم ایز نا چینی کمپنی تتون جوائنٹ وینچرز خواہک ہرا پاکستان کن ستاکڑزوک مریک، حکومت دا چرجوئی ٹی ہرممکن کمک و آسراتی فراوان کیک ۔ وزیراعظم حبکو آ زور شاغا کہ او دا ڈٹ انا ایندھن نا 20 درسد تھرکول آن دوئی کے، داڑان ملک انا بھلو زرمبادلہ نا بچت مننگ کیک ۔ اوپارے کہ ننا غٹ آن بھلا ویل کرنٹ اکاءونٹ نسخان نا ءِ ہراتم ننا حکومت بس تو ہمو وخت آ 20 ارب ڈالر نا کرنٹ اکاءونٹ نسخان ئس ہرانا سوب آن روپئی آ زور ودا و کبینی ٹی ودکی مس ۔ وزیراعظم پارے کہ نن خوانہ کہ بجلی نا ڈٹ آتے کن ہندی وسیلہ غاتے کاریم اٹ اتنگے، پاکستان اٹی 50 ہزار میگاواٹ پن بجلی ودی کننگ نا لاءخ ءِ ولے بدبختی اٹ مستین اٹی دیر، گیس و کولانا وسیلہ غاتیان فائدہ ہرفنگ آ چکار کننگتو ۔ اوپارے کہ نن ہندی ذریعہ اٹ بجلی جوڑ کینہ تو اونا فائدہ کاروبار و صنعت ءِ ہم مریک ہراڑان کاروبار و پیدواری خڑچ کم مریک ۔ وزیراعظم کراچی کن سمندری دیر ساف کننگ نا ڈٹ آتیا کاریم نا بناءِ کننگ نا پارت ہم کرے تانکہ کنوئی آ دیر انا ویل ایسر مننگ کے ۔ وزیراعظم پارے کہ پاکستان اٹی کاروبار نا کسر اٹی غٹ آن بھلا اڑاند خیسن آ فیتہ و وڈی خوری نا غرض اٹ تاخیری حربہ غاک مسنو، نن دا ویل آ چکار کرینن و کاروبار اٹی آسانی ودی کرینن وخت اس کہ دا چرجوئی ٹی پین کاریم ہم کننگک ہرانا گچین بھرم دوئی مریک دا بابت وزیراعظم آفس و زرکاری بورڈ پدریسہ کوشست کننگ ءُ ۔ اوپارے کہ وڈی خوری نا سوب آن پاکستان ءِ بھاز نسخان رسینگانے، ریکوڈک اٹی کاریم کروک آ کمپنی رابطہ کرینے، او ساڑی حکومت نا شفافیت و وڈی خوری نا برخلاف عزم انا رداٹ دُورہ کاریم ءِ بناکننگ آ آمادہ ءِ ، صوبہ بلوچستان قدرتی وسیلہ غاتیان ہمپوک ءِ و ریکوڈک اٹی کاریم کروک آ کمپنی داجاگہ نا خیسن و پتل نا کوڑی تے دنیا ٹی غٹ آن گچین گوندانے ۔ اوپارے کہ ای 22سال آن پاننگ اُٹ کہ غٹ آن بھلا ویل وڈی خوری ءِ ، مستین اٹی چنکو ٹولہ اس تینا تجوری تے پُر کننگ کن ملکی خزانہ ءِ نسخان رسیفے ، ہنداسوب ءِ کہ تدوک آ دور تیٹی وڈی خوری نا سوب آن پیشن نا زرکاری متو، ننا حکومت اٹی پیشن نا زرکارآک پاکستان آ بننگ نا خواہندار ءُ ۔ اوپارے کہ ننے ملک اٹی ساف و شفاف گورننس تروئی ءِ ہرا آخبت کن المی ءِ ، اینو ملک انا وامدار مننگ نا اسہ سوب ہندادے کہ داڑے گچین اسلوب حکمرانی قائم کننگ متو ۔ وزیراعظم پارے کہ بروک آ وخت سی پیک انا بابت بھاز اہم مریک، دا ڈٹ پاکستان کن بھلو موقع اسے و نن داڑا مون آ ہِننگ اُن ۔ اوپارے کہ بلوچستان کن خوشخبری ءِ کہ چین ماہی پروری و کشاری بشخ آتے ٹی ہم زرکاری کننگ خواہک، نن چین نا کشاری آزموندہ و چاہنداری تیان فائدہ ہرفنگ خوانہ ۔ اوپارے کہ چین نا صدر و وزیراعظم بیلٹ اینڈ روڈ انا فلیگ شپ ڈٹ سی پیک اٹی بھاز است خواہی تخرہ، دا ڈٹ ءِ بروک آ مرحلہ ٹی دننگ کن پاکستان سی پیک اتھارٹی نا قیام عمل اٹی ایسونے ۔ اوپارے کہ پاکستان کن اونا اسٹریٹجک حیثیت و ورنا آبادی بھاز اہم ءِ، ننے تینا ورنا آبادی ءِ فعال کروئی ءِ و دامسخت کن چین نا کمک اٹ پوسکن انگا ٹیکنالوجی و مصنوعی ذہانت تون اوار اہم بشخ آتا تربیتی جاگہ ملنگک ، ننے تینا ورناتے کسب و تربیت ترسا ملک انا میرات جوڑ کروئی ءِ ہرا پاکستان ءِ مون آ دیرہ ۔ وزیراعظم وزیراعلیٰ بلوچستان آ زور شاغا کہ لسبیلہ ٹی خصوصی اقتصادی زون جوڑ کننگے، پیشن نا زرکارآک داڑے بننگ خوارہ ، اوفتے آسانی فراوان کننگ بے حد المی ءِ ۔ وزیراعظم حبکو تون اواری اٹ 1320 میگاواٹ نا ڈٹ خلنگ آ چائنہ پاور نا منت واری ءِ ہرفے و داڈٹ آ کاریم کروک آ چینی ورکرز آتون اوار اوار پاکستان نا تعلقدار وزارت و محکمہ غاتا ہم ستاءِ کرے ۔ داکان مست دود آن تران کرسا وزیراعلیٰ بلوچستان جام کمال خان پارے کہ وزیراعظم پاکستان نا تعمیر و ترقی ٹی بھاز است خواہی تخک و حب پاور جنریشن پلانٹ دانا عکاس ءِ ۔ اوپارے کہ بنجائی و صوبائی حکومت اواری اٹ زرکارآتے کن سازگار چاگڑد فراوان کننگ ءُ ۔ چین اتون اوار درملکی سیل و سواتی تیکن زرکاری نا بے پناہ وارخواہی ارے، نن چین زرکارآتے سلہ خلینہ کہ او زرکاری نا سازگار چاگڑد آن فائدہ ہرفر ۔ اوپارے کہ گوادر تون اوار بلوچستان نا چندی علاقہ غاتے ٹی شونداری ڈٹ آتیا کاریم برجاءِ، ارب آ روپئی نا زرکاری مریک و بروک آ منہ سال اٹی بلوچستان زرکاری نا جاگہ اس جوڑ مننگ والا ءِ ۔ اوپارے کہ نن اواری اٹ زرکارآتے کن سازگار چاگڑد فراوان کننگ اُن ہراڑان ہندی و درملکی زرکارآتے فائدہ مریک ۔ اوپارے کہ پاکستان اٹی متبادل ذریعہ اٹ توانائی نا دوئی کننگ کن کاریم برجاءِ و قابل تجدید توانائی نا بشخ آتے ٹی زرکاری آن بلوچستان اٹی زرکاری بریک ۔