وزیراعظم عمران خان نا پاکستان تحریک انصاف نا سندھ اسمبلی نا باسک آتون اوڑدہی ٹی ہیت وگپ

ملک انا معاشی حالیت آک بھلو حد اسسکان گچین مسنو

باسک آک تینا حلقہ غاتے ٹی شونداری کاریم وویل آتیان معلومدار کریر

کراچی ۔ 21اکتوبر (اے پی پی) وزیراعظم عمران خان تون پاکستان تحریک انصاف نا سندھ اسمبلی نا باسک آک دوشنبے نادے آ داڑے اوڑدہی کریر ۔ اوڑدہی ٹی گورنر سندھ عمران اسماعیل ، بنجائی وزیر پارلیمانی امور اعظم خان سواتی، وزیر ڈٹ بندی مخدوم خسرو بختیار، وزیر بحری امور سید علی زیدی، وزیر آبی وسیلہ فیصل واوڈا، خصوصی کمکار ندیم بابر و قومی اسمبلی نا باسک اسد عمر ئسک ہم ساڑی ئسر ۔ اوڑدہی ٹی باسک آک تینا حلقہ غاتے ٹی مروک آ شونداری کاریم و ویل آتیان معلومدار کریر ۔ اوڑدہی ٹی وزیراعظم باسک آتون گپ و تران کرسا پارے کہ کراچی ملک انا معاشی مرکز ءِ ۔ بنجائی حکومت ءِ کراچی ٹی دیر، ٹرانسپورٹ، ویسٹ مینجمنٹ و الس ءِ مون تروک ایلو ویل آتا پورو ادراکءِ ۔ اوپارے کہ بدبختی اٹ مستین اٹی کراچی نا الس و کراچی نا ویل آتے گوجالنگا ۔ کراچی نا ویل آتے ایسر کننگ صوبائی حکومت نا کاریم ءِ ولے السی راجی آسراتی ءِ مون آ تخسا بنجا تینا وسیلہ غاتارداٹ کراچی نا ویل آتا ایسری ٹی تینا بشخ ءِ شاغنگ ءِ ۔ وزیراعظم پارے کہ بلدیاتی نظام کراچی نا ویل آتا ایسر اس کشنگ اٹ کمکار مریک ۔ ننا حکومت ءِ تاریخ نا غٹ آن بھلا معاشی نسخان میرات اٹی ملا ۔ ولے داسہ ملک انا معاشی حالیت آک بھلو حد اسسکان گچین مسنو ۔ صوبہ سندھ انا معاشی حالیت آک وڈی خوری نا سوب آن ابتر مسر ۔ وزیراعظم بنجائی وزیر آتے پارت کرے کہ او کراچی نا اسمبلی نا باسک آتون رابطہ غاتے پین ودفر ۔ داوخت آ بنجائی وزیر ڈٹ بندی مخدوم خسرو بختیار سندھ اسمبلی نا باسک آتے کراچی ٹی جاری و زیر غور بنجائی ڈٹ آتیا حوال تس ۔ داوخت آ گورنر سندھ بنجانا کنڈآن باوری کرفے کہ کے ۔ فور ڈٹ ءِ ہر حال اٹ پورو کننگک ۔