وزیراعظم نا سلاہکار خزانہ و محصولات ڈاکٹر عبدالحفیظ شیخ نا جہانی بینک و آئی ایم ایف نا سروک آتون اوڑدہی

اسلام آباد ۔ 21اکتوبر (اے پی پی) جہانی بینک و آئی ایم ایف ناسروک آک ڈاکٹر حفیظ شیخ تون اوڑدہی کریر ہراٹی پاکستانی معیشت نا پورو مخ تفی نا درشانی ءِ کننگا ۔ وزیراعظم نا سلاہکار خزانہ و محصولات ڈاکٹرعبدالحفیظ شیخ و اوڑتون اوار پاکستانی ڈل واشنگٹن نا دورہ ٹی جہانی بینک و انٹرنیشنل مانٹری فنڈ انا سروک آتون جتا اوڑدہی کریر و اوفتے پاکستانی معیشت اٹی سوگوی و ادارہ جاتی اصلاحات آتا نافذ کننگ نا کوشست و خاص کر ساڑی مالی سال انا اولیکو سہ ماہی ٹی معاشی ٹک آتے ٹی مروک آ نمان گچینی آن معلومدار کریر ۔ وزارت خزانہ نا کنڈآن جاری بیان نا رداٹ ڈاکٹر عبدالحفیظ شیخ و اوڑتون اوار پاکستانی ڈل اولیکو اوڑدہی ٹی جہانی بینک انا منیجنگ ڈائریکٹر ایکسل وان ٹراٹسن برگ و ایلو بڑزکو کمامدارآتون اوڑدہی کریر ہراٹی سلاہکار خزانہ پوسکن آ ایم ڈی ءِ اونا تعیناتی آمبارکبادی تس و جہانی بینک انا کنڈآن پاکستان ءِ تروک آ امداد آ اونا منت واری ءِ ہرفیر ۔ سلاہکار خزانہ اوڑدہی ٹی پاکستان اٹی جہانی بینک انا ڈٹ آتا پوروی نا رفتار ءِ گچین کننگ و دارداٹ کروک آ حکومتی گام گیج آتے مون آ تخا ۔ جہانی بینک انا منیجنگ ڈائریکٹر ایکسل وان ٹراٹسن برگ سلاہکار خزانہ ءِ پارے کہ پاکستان جہانی بینک انا بھلا شریدار آتیان اسٹ مننگ آن بیدس انٹر نیشنل ڈویلپمنٹ ایسوسی ایشن ورلڈ بینک انا کنڈآن تروک آ امداد آن ہم بھلو کچ اسے آ فائدہ ہرفنگ ءِ ۔ ایکسل وان ٹراٹسن برگ پارے کہ پاکستان جہانی بینک انا دوئی وسیلہ غاتا بایدے پبی فائدہ ہرفے ۔ اوپاکستانی حکومت نا معاشی نمو و شونداری نا کوشست آتے ٹی جہانی بینک انا پبی امداد نا درشانی ءِ کرے ۔ داکان بیدس ڈاکٹر عبدالحفیظ شیخ و اوڑتون اوار پاکستانی ڈل انٹرنیشنل مانیٹری فنڈ(آئی ایم ایف) نا منیجنگ ڈائریکٹر کرسٹالینا جارجیوا و ایلو بڑزکو کمامدارآتون ہم اوڑدہی کریر ہراٹی ڈاکٹر عبدالحفیظ شیخ پوسکن آ ایم ڈی ءِ اونا تعیناتی آمبارکبادی تس و اودے پاکستان اٹی آئی ایم ایف پروگرام نا نافذ کننگ آ داوخت اسکان مروک آ پیش رفت آن معلومدار کرے ۔