مولانا فضل الرحمان آزادی مارچ انا کمک اٹ کشمیر نا ویل ءِ تالان کننگ نا کوشست آتیان چکار ءِ اسہ کنڈ کننگ خواہک، وزیر مملکت پارلیمانی امور علی محمد خان

اسلام آباد ۔ 21اکتوبر (اے پی پی) وزیر مملکت پارلیمانی امور علی محمد خان پارینے کہ وزیراعظم عمران خان نا مخلص سرکڑدہ ہی ٹی پاکستان تحریک انصاف نا حکومت جمعیت علمائے اسلام (ف) انا سروک مولانا فضل الرحمان تون پرامن مذاکرات نا بناءِ کننگ خواہک ۔ آزادی مارچ کشمیر نا ویل ءِ تالان کننگ نا کوشست آتے بھاز بے وڑ زہمی کننگ کیک ۔ نجی نیوز چینل تون گپ و تران کرسا وزیر مملکت پارے کہ مذاکرات ہی ہمو اسٹ انگا کسر ءِ ہرانا کمک اٹ سیاسی جماعت آک تینا گڑتی تے مر کننگ کیرہ ۔ علی محمد پارے کہ اسلام آباد اٹی دھرنہ نا فیصلہ غا (ن) لیگ و پیپلزپارٹی نا سیاسی جماعت آک داسہ ہم الجھن اٹی ءُ ۔ اوجے یو آئی ف انا سروک نا کنڈآن پڑوکروک حکومت مخالف تحریک آ ہم تنقید کرے و پارے کہ مولانا صاحب دا نام نہاد آزادی مارچ انا کمک اٹ دِنا آجوئی ءِ خواہک ۔ اوپارے کہ مولانا فضل الرحمان نا کنڈآن داپیدوار اف کہ اونا دھرنہ کشمیر کن ءِ یا پی ٹی آئی نا جمہوری حکومت نا برخلاف ءِ ۔ جے یو آئی (ف) انا سروک مولانا فضل الرحمان کشمیر کمیٹی نا چیئرمین ئس ولے او کشمیر نا بابت اسہ لوز اس ہم پاتو ۔ اوپارے کہ مولانا فضل الرحمان کشمیر کاز آ تینا مفننگ نا بریبر کارکڑدگی نا بایدے تلافی ءِ کروسس، اومستی پارے کہ حکومت ہیت وگپ کننگ کن تیار ءِ ولے بلیک میلنگ ءِ امنا کننگ مفک ۔ وزیر مملکت پارے کہ پی ٹی آئی نا حکومت ہچ کس ءِ ملک انا امن و ایمنی نا حالیت آتے خراب کننگ نا موکل تفک ۔ اوپارے کہ انارکی تالان کروک آتا برخلاف کانود و آئین نا رداٹ کارروائی کننگک ۔ وزیر مملکت مستی پارے کہ پاکستان اسہ مشکل ءُ مرحلہ سے آن گدرینگ انگ ءِ و مقبوضہ کشمیر نا حالیت آک بے کچ نازرک ءُ ہنداخاطران نن غٹ ایلوفتیا تنقید کننگ نا جاگہ غا بایدے کشمیر نا ویل ءِ چست کین ۔ علی محمد پارے کہ مدرسہ غاتا کودک طالب علم آتے جندی مسخت آتے کن کاریم اٹ اتنگ سہی اف ۔ اوپارے کہ داوڑنا دھڑکو تروک چم آتا رند اٹ حزب اختلاف نا اصل مسخت حکومت آ احتساب آن بچنگ و جندی مسخت آتا دوئی کننگ کن زور شاغنگ ناءِ ، اوپارے کہ مولانا فضل الرحمان کشمیر نا ویل ءِ تالان کننگ نا کوشست آتیان خلقت نا چکار ءِ اسہ کنڈ کننگ خواہک ولے پی ٹی آئی نا حکومت دا مسخت کن پرعزم ءِ ۔ اوپارے کہ تحریک انصاف نا حکومت و پاک فوج کشمیر نا ویل انا بارواٹ اسہ پنہ غاٹو ۔ اواپوزیشن آ زور شاغا کہ او بھارت نا زیر انتظام کشمیر نا الس تون یکجہتی نا درشان کن حکومت نا کنڈآن بناکروک سرجزآتے ٹی بشخ ہلے ۔ اوپارے کہ غٹ داخلی و خارجی چیلنج آتیان پد ہم داہیت ستاکڑزنگ نا قابل ءِ کہ وزیراعظم عمران خان کشمیر نا ویل ءِ ہر جہانی کہول آ گچین وڑاٹ تالان کننگ ءِ ۔