صوبائی حکومت وزیراعلیٰ بلوچستان میر جام کمال خان نا کماشی ٹی صوبہ ءِ شونداری و شونہالی نا کسر آ روان کننگ کن پبی گام گیج کننگ ءِ، صوبائی وزیر پی ایچ ای حاجی نور محمد خان دمڑ نا میڈیا تون گپ و تران

کوءٹہ ۔ 21اکتوبر (اے پی پی) صوبائی وزیر پی ایچ ای حاجی نور محمد خان دمڑ پارینے کہ حلقہ گچین کاری نا ہڑتوم آ ضلع غاتا شونداری کن ارب آ روپئی شونداری ڈٹ منظور کریفینن، حلقہ ٹی اوار ہڑتوم آ ہرنائی و زیارت ضلع غاتا 4تحصیل آتے ٹی کم و ود 5ارب روپئی نا شونداری ڈٹ ، پی ایس ڈی پی ٹی اوارءُ ۔ صوبائی حکومت وزیراعلیٰ بلوچستان جام کمال خان نا کماشی ٹی صوبہ ءِ شونداری و شونہالی نا کسر آ روان کننگ کن پبی گام گیج کننگ ءِ ، داخیال آتا درشانیءِ او ہندی صحافی تتون گپ و تران کرسا کرے، او پارے کہ تحصیل سنجاوی نا الس نا راجی آسودہی کن اسہ ارب روپئی تخنگانے انتئے کہ تحصیل سنجاوی آ مستین نا گچین مروک آ نمائندہ غاک ہچ ءُ چکار اس کتنو ۔ سنجاوی لورالائی روڈ، سنجاوی بائی پاس، سنجاوی واٹر سپلائی کن بجلی نا جتا فیڈر اسے نا منظوری ، سنجاوی ٹی گریڈ اسٹیشن نا منظوری ، سنجاوی زیارت نا نیام اٹ روڈ، سنجاوی ءِ میونسپل کمیٹی نا درجہ تننگ آن پد میونسپل کمیٹی نا پوسکن آ بلڈنگ نا تفنگ کن فنڈ انا منظوری، تحصیل ہیڈ کوارٹر ہسپتال سنجاوی کن 3پوسکن و پوسکن آ آسراتی تیان آراستہ ایمبولینس انا منظوری ، ہسپتال کن دوائی نا جتا ءُ بجٹ اس منظوری مننگ آن بیدس چندی شونداری ڈٹ آک اوار ءُ ۔ صوبائی وزیر حاجی نور محمد خان دمڑ پارے کہ ننا اولیتی حلقہ نا الس نا اجتماعی ویل آتا ایسری ءِ ہراڑکن دے و نن کوشست کننگ اُٹ، اوپارے کہ حلقہ ٹی اوار غٹ علاقہ نا الس نا بے تعصب رنگ و نسل زبان خذمت ءِ کننگ اُن، ساڑی صوبائی حکومت صوبہ ٹی تعلیم، کنوئی ءُ ساف دیر، روڈ، بجلی، روزگار تون اوار الس نا اجتماعی ویل آتے ایسر کننگ آ خصوصی چکار کننگ انگ ءِ ، اوپارے کہ صوبہ نا پسماندگی نا زموار قوم پرست و مذہب پرست جماعت آک ءُ ۔ ہرافک کیہی دہائی حکومت کننگ آن پد ہم صوبہ نا الس نا بنداوی ویل آتے ایسر کننگ آ چکار کننگ نا جاگہ غا تینا کاروبار تے ودفنگ، بینک بیلنس ءِ ودفنگ آ چکار کریر ہرانا سوب آن الس نا ویل آتے ٹی کمتی نا جاگہ غا ودکی مس، ولے ساڑی حکومت اسہ سالہ گونڈ وخت اٹی صوبہ نا الس نا بنداوی ویل آتے ایسر کننگ آ پبی چکار کرسا السی ویل آتے ٹی بھلو حد اسسکان کمتی مسنے، و صوبہ شونداری و شونہالی نا کسر آ روان ءِ، اوپارے کہ تینا الس تون دروغ انا وعدہ آخا بلکن ہرا وعدہ غاتے کیوہ، اوفتے عملی دروشم اس ایتیوہ، حلقہ نا الس ہرا پت انا درشانی ءِ کرینے اوفتا پت ءِ ٹھیس تفرہ ۔