ہڑتوم آ کنڈآتا علاقائی و جہانی معاملہ غاتیا گپ وتران
اسلام آباد ۔ 17اکتوبر (اے پی پی) وزیراعظم عمران خان تون اومان نا سلہہ بند فوج انا چیف آف اسٹاف لیفٹیننٹ جنرل احمد بن حارث النبہانی پنچ شنبے نادے آ داڑے اوڑدہی کرے و اوڑتون ہڑتوم آ کنڈآتا علاقائی و جہانی معاملہ غاتیا گپ و تران کرے ۔ وزیراعظم عمران خان پاکستان و اومان نا خڑکی ایلمی تعلقداری تا ذکر ءِ کرے و ہڑتوم آ کنڈآتا کمکاری ءِ مون آ دننگ انا عزم انا درشانی ءِ کرے ۔ اوڑدہی ٹی واپار و مواصلاتی رابطہ غاتا مون آ دننگ آہم گپ وتران کننگا ۔ وزیراعظم اومان نا سلہہ بند فوج انا چیف آف اسٹاف ءِ مقبوضہ کشمیر اٹی انسانی حق انا سنگین حالیت، غیر انسانی لاک ڈاءون، کرفیو و مواصلاتی نظام نا بندی آن معلومدار کرے ہرا 5اگست آن برجاءِ و 80 لکھ آن زیات کشمیری داڑان بھاز زہمی مسنو ۔ وزیراعظم پارے کہ تنازع نا اسٹ انگا ایسری اقوام متحدہ نا سلامتی کونسل نا قرارداد آتیان ممکن ءِ ۔ اومان نا سلہہ بند فوج انا چیف آف اسٹاف سلطان قابوس بن السید نا کنڈآن نیک است خواہی تا کلہو ءِ اودے سرکرے ۔ اوپاکستان و اومان نا سوگو ہڑتوم آ تا تعلقداری نا ذکر ءِ کرے و ہڑتوم آکنڈآتا ڈل آتا دورہ، تربیتی پروگرام، اسیجا مشق آتون اوار دفاعی کمکاری نا ساڑی کہول آ است جمی نا درشانی ءِ کرے ۔ اواقوام متحدہ نا جنرل اسمبلی ٹی وزیراعظم نا تقریر نا ستاءِ کرے و خلیج اٹی بے چیٹی ٹی کمتی و علاقائی امن و سلامتی ءِ مون آ دننگ کن وزیراعظم نا گام گیج آتا ستاءِ کرے ۔ اوزیراعظم ءِ اومان نا سرکڑدہ غاتا کنڈآن تینا ملک انا سلہ ہم خلک ۔
