اسلام آباد ۔ 17اکتوبر (اے پی پی) وزیراعظم عمران خان پارینے کہ حکومت ورناتا شونداری و اوفتے اوفتا نت تیا سلفنگ کن گام گیج کننگ ءِ، سرسہب ورنا پروگرام نا رداٹ مچ آ ملک انا 10 لکھ ورناتے میرٹ آ 100 ارب روپئی نا وام تننگک، 25 درسد وام زالبول آتے کن مریک، اسہ لکھ انا وام بے سود تننگک، اسہ لکھ ورناتے ٹیکنالوجی نا تربیت ایتنہ ۔ پنچ شنبے نادے آ سرسہب ورناپروگرام نا بنائی دود آن تران کرسا وزیراعظم عمران خان پارے کہ سرسہب ورنا پروگرام نا اولیکو مرحلہ نا بناء آ مبارکباد پیش کیوہ، دنیا ٹی ہمو قومک مون آ کارہ ہرافتے ٹی میرٹ نا نظام مریک، سرسہب ورنا پروگرام نا خاصہ میرٹ ءِ ، نن خوانہ میرٹ غٹ آن مست مرے ، میرٹ ہی جمہوری نظام نا خاصہ مریک ۔ اوپارے کہ دنیا ٹی میرٹ آ عمل کروک قومک ہی شونداری نا مزل آتے طے کیرہ ۔ اوپارے کہ مستین اٹی میرٹ ءِ گوجالنگ آن ملکی ویل آک ودی مسر، پاکستان تحریک انصاف نا حکومت میرٹ و شفافیت آ باورکیک، شونداری کن ننے مثبت سوچ اتون ہدف آتے بھلن تخوئی مریک ۔ عمران خان پارے کہ تاریخ اٹی ماڑی و دولت نا بنداو آ زندہ سلنگ مفک ، انسانیت نا خذمت ہی تاریخ اٹی اہم ءُ ہنداس ترفک ۔ اوپارے کہ بھلو انسان اس جوڑ مننگ کن حضرت محمد نا زندگی ءِ واروار خوانوئی مریک، اسہ انسان اس ہم خواجہ محمد نا نت تا مش تا بریبر مننگ کپک، خواجہ نا تعلیمات آک انسانی تاریخ اٹی انقلاب اس برپاکریر ۔
