اسلام آباد ۔ 17اکتوبر (اے پی پی) امیر البحر ایڈمرل ظفرمحمود عباسی تون اومان نا سلہہ بند فوج انا چیف آف اسٹاف اوڑدہی کرے ہراٹی تین پہ تینی است خواہی نا معاملہ ، علاقائی سیکورٹی و ہڑتوم آکنڈآتا کمکاری آ گپ و تران کننگا ۔ پاک بحریہ نا ترجمان نا رداٹ اومان نا سلہہ بند فوج انا چیف آف اسٹاف نیول ہیڈکوارٹرز اسلام آباد نا دورہ ءِ کرے ۔ نیول ہیڈکوارٹرز آ بننگ آ پاک بحریہ نا سروک ایڈمرل ظفرمحمود عباسی شرفدار آ مہمان ءِ بخیر کرے ۔ شرفدار آ مہمان ءِ روایتی وڑاٹ گارڈآف آنر پیش کننگا ، اوکان پد او نیول ہیڈکوارٹرز اٹی یات گار شہید آتیا پھل آتا چادر اس شاغا و پرنسپل اسٹاف آفیسر آتون جوڑ بڑکرے ۔ اومان نا سلہہ بند فوج انا چیف آف اسٹاف پاک بحریہ نا سروک ایڈمرل ظفر محمود عباسی تون اوڑدہی کرے ۔ نیول چیف ڈیہہ نا بحری سیکورٹی ٹی پاک بحریہ نا کڑد ءِ مون آ تخا ۔ اومان نا سلہہ بند فوج انا چیف آف اسٹاف پاکستان و اومان بحریہ نا سوگو تعلقداری تا ستاءِ کرے و آخبت اٹی دافتے پین ودفنگ نا عزم انا درشانی ءِ کرے ۔
