اسلام آباد ۔ 17اکتوبر (اے پی پی) وزیر مملکت ہاءوسنگ اینڈ ورکس شبیر علی قریشی پارینے کہ وزیراعظم عمران خان حقی وڑاٹ اقوام متحدہ نا جنرل اسمبلی ٹی کشمیری تا نمائندگی ءِ کرینے، مقبوضہ کشمیر اٹی بھارت نا بیدادی کاٹم آن گدرینگانے و دنیا ہُننگ ءِ ولے داسہ وخت ءِ کہ کشمیری تے آجوئی تننگے ۔ داہیت ءِ او ’’اے پی پی‘‘ تون گپ و تران کرسا پارے ۔ اوپارے کہ کشمیری اسہ بہادر ءُ قوم اسے ءُ و کشمیریک بھارت نا ہر چم انا جیرت و بہادری اٹ مقابلہ ءِ کرینو ۔ اوپارے کہ اِراتُو آن زیات وخت مسنے و مقبوضہ کشمیر اٹی کرفیو خلسا بھارت ظلم کننگ ءِ ۔ اواسہ سوج اسے نا ورندی ٹی پارے کہ داسہ کشمیری تا جہد رنگ اس اتنگ والا ءِ و و ہچ ءُ واک اس اوفتے آجوئی دوئی کننگ آن توننگ کپک ۔ اسہ پین سوج اسے ناورندی ٹی شبیر علی قریشی پارے کہ مچ آ قوم کشمیری تتون سلوک ءِ ، کشمیری تا سیاسی ، سفارتی و اخلاقی مخ تفی ءِ ہر فورم آ برجاتخنگک ۔ اسہ پین سوج اسے نا ورندی ٹی اوپارے کہ کشمیر نا معاملہ ءِ ہراوڑوزیراعظم عمران خان جہانی برادری نا مون آ ہرفینے، اونا ہچ ءُ مثال اس ملیپک ۔
