اسلام آباد ۔ 17اکتوبر (اے پی پی) بنجائی وزیر توانائی عمر ایوب خان پارینے کہ چین پاکستان اقتصادی راہداری نا رداٹ گوادر اٹی آئل ریفائنری نا ٹہیفنگ کن تکنیکی چاہندار آتا خذمت آتا دوئی کننگ نا عمل بناکرینے، دونیم لکھ آن مسہ لکھ بیرل اسکان ہردے پیدواری گنجائش تخوک آئل ریفائنری نا ٹہیفنگ آن تیل انا درآمدی بل اٹی سالانہ مسہ ارب ڈالر نا بچت مریک ۔ داخیال آتا درشانیءِ او عرب نیوز ءِ اسہ انٹرویو اسے ٹی پارے ۔ اوپارے کہ آئل ریفائنری کن تکنیکی چاہندارآتا خذمت دوئی کننگ نا عمل مسہ تُو اٹی پورو کننگک، دا پاکستان اٹی سعودی زرکاری نا اولیکو مرحلہ ءِ دا چرجوئی ٹی ہدف آتا دوئی مننگ آن پد بروک آ مرحلہ ٹی زرکاری بناکیک ۔ اوپارے کہ سعودی عرب نا کمک اٹ توانائی نا بشخ اٹی 14ارب 50 کروڑ ڈالر نا ڈٹ آتیا کاریم بناکرینے و داڑان پاکستان ءِ 2030ء اسکان انرجی مکس 30 درسد اسکان قابل تجدید توانائی اسکان دننگ اٹ کمک رسینگک ۔ اوپارے کہ بجلی نا بشخ اٹی سعودی زرکاری نا رداٹ بلوچستان اٹی چار ءُ نیم ارب ڈالر نا خڑچ آن قابل تجدید توانائی نا 500 میگاواٹ نا ڈٹ خلنگک وخت اس کہ گوادر اٹی آئل ریفائنری نا بھلا ڈٹ آ 10 ارب ڈالر نا زرکاری مریک ہراکہ سعودی ولی عہد نا پاکستان نا دورہ ٹی 20 ارب ڈالر نا زرکاری نا پڑو نا بشخ ءِ ۔ اوپارے کہ داوخت قومی گریڈ آ قابل تجدید توانائی نا بشخ کم و ود 5آن 6درسد ءِ ۔ اوپارے کہ ہائبر ڈو سولر ڈٹ آتا جاچ ءِ ہلنگ کن سعودی عرب نا کمپنی ایکواپاور، پاکستان نا نیشنل ٹرانسمیشن اینڈ ڈسپیچ کمپنی و ایلو کمپنیک سروے کرینو ۔ سعودی عرب نا ولی عہد شہزادہ محمد بن سلطان نا دورہ ٹی ہڑتوم آ ملک آتا نیام اٹ بجلی و تیل انا بشخ اٹی 20 ارب ڈالر آن زیات نا گونڈ، وسط و مریس وخت زرکاری نا معاہدہ غاتیا دستخط کننگاسس ۔ گونڈ وخت انا ہرا ڈٹ آتا معاہدہ غاتیا دستخط کننگا اوفتے ٹی چار ارب ڈالر نا خڑچ آن آر ایل این جی نا اِرا پلانٹس نا قیام، پاکستان اٹی قابل تجدید توانائی نا بشخ اٹی ایکواپا ور کمپنی نا کنڈآن اِرا ارب ڈالر نا زرکاری و پاکستان کن سعودی فنڈ انا کنڈآن اسہ ارب ڈالر نا فراوانی کون آ ڈٹ آک اوارءُ ۔ وسط وختی ڈٹ آتے ٹی اسہ ارب ڈالر نا خڑچ آن پٹرولیم کمپلیکس، خور وکشت وکشار نا ڈٹ آک اوارءُ، وخت اس کہ مریس وختی زرکاری نا رداٹ سعودی آرامکو کمپنی گوادر اٹی 10ارب ڈالر نا زرکاری کیک وخت اس کہ 2 ارب ڈالر نا زرکاری معدنیات نا بشخ اٹی مریک ۔ عمر ایوب خان پارے کہ بجلی نا ہراڈٹ آتا بناءِ کننگک اوفتے ٹی بلوچستان اٹی حبیب اللہ کوسٹل پاور اسٹیشن آ 200 میگاواٹ نا سولر پاور پلانٹ و مسہ ایلو ضلع غاتے ٹی 100,100 میگاواٹ نا پلانٹس خلنگک ۔ اوپارے کہ متبادل توانائی نا شونداری نا بورڈ تدوک آ ہفتہ قابل تجدید توانائی پالیسی نا مسودہ نا منظوری ءِ تسنے ہرانا رداٹ نن قابل تجدید توانائی ناپیدوار ہراداوخت 1500 میگاواٹ ءِ ، 2025ء نا ایسر اسکان 8 ہزار میگاواٹ و 2030ء اسکان 20 ہزار میگاواٹ اسکان دینہ ۔ عمرایوب خان پارے کہ سعودی عرب و پاکستان بلوچستان اٹی ہندی وسیلہ غاتیان فائدہ و تیل و گیس انا بشخ اٹی پٹنگ و پیدوار نا سرجزآتے مون آ دننگ کن اسہ ایلو تون کمک کننگ ءُ و پاکستان اٹی تیل و گیس انا پٹنگ کن کم و ود 40 بلاکس آتا نیلامی کننگک ۔
