وزیراعظم عمران خان نا کماشی ٹی وڈی خوری نا برخلاف گام گیج آتا مچ آ دنیا ٹی است بڈی ءِ کننگ انگ ءِ
اسلام آباد ۔ 17اکتوبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان نا کماشی ٹی وڈی خوری نا برخلاف گام گیج آتا مچ آ دنیا ٹی است بڈی ءِ کننگ انگ ءِ ، مولانا فضل الرحمان مدرسہ غاتا چناتا ذہن تے اپاہج کرسا اوفتے تینا سیاسی برتری نا ایندھن کننگ نا کوشست کننگ ءِ، 27اکتوبر آ کشمیریک یوم سیاہ اڈتننگ ءُ و مچ آ قوم کشمیری تتون یوم یکجہتی نا درشانی ءِ کیرہ، مولانا فضل الرحمان تون ملک انا سوگوی، الس ءِ کبینی آن نجات ترفنگ و معیشت نا گچینی کن سلاہ اس ارے تو ننے پائے، حکومت اوفتیا عمل کرسا الس نا زند اٹی گچینی اتنگ کیک ۔ نجی ٹیلی ویژن چینل تون گپ و تران کرسا اوپارے کہ مولانا تون مثبت سلاہ ارے تو حکومت ءِ پائے ۔ ڈاکٹر فردوس عاشق اعوان پارے کہ جے یو آئی تون مذاکرات نا زمواری ءِ پرویز خٹک ءِ تننگانے، سیاسی جماعت آتا کنڈآن حکومت ءِ اُراغا گدریفنگ نا ارمان دیوان تا بھڑک تو مننگ کیک داحقیقت نا دروشم اس ہلنگ کپک ۔ اوپارے کہ وزیراعظم عمران خان نا کماشی ٹی وڈی خوری نا برخلاف گام گیج آتا مچ آ دنیا ٹی است بڈی ءِ کننگ انگ ءِ، دا عمل بایدے مون آ کائے ودادے لتاڑنگ نا کوشست آتا حوصلہ شکنی ءِ کننگے ۔ خصوصی کمکار پارے کہ ریاست نا زمواری الس نا جان و مال انا رکھءِ المی کننگ و داڑکن عملی گام گیج کننگ نا ءِ ۔ مولانا مدرسہ غاتا چناتا ذہن تے اپاہج کرسا اوفتے سیاسی برتری نا ایندھن کننگ نا کوشست کننگ ءِ، دا معاملہ غا حکومت خاموش تولپک، حکومت دا بابت تینا حکمت عملی ءِ صوبائی حکومت آتا سلابت اٹ ترتیب ایتک ۔ اوپارے کہ27اکتوبر آ کشمیریک یوم سیاہ اڈتننگ ءُ و مچ آ قوم کشمیری تتون یوم یکجہتی نا درشانی ءِ کیرہ و مولانا داعزم ءِ پارہ پارہ کننگ خواہک، ہرادے حکومت ہچ ءُ حالیت اسے ٹی سگپک ۔ اوپارے کہ برانز ہر شاری نا آئینی و جمہوری حق ءِ و حکومت داحق ءِ امنا کیک ولے برانز آن اسکول و ہسپتال آتا بند مننگ آن نسخان دِنا مریک ۔
