وزیراعظم عمران خان سی پیک ءِ مچ آ ڈیہہ کن گیم چینجر سرپند کیک، ڈٹ پاکستان و چین ءِ فعال و گچین اقتصادی شریدار ثابت کرینے
بیجنگ ۔ 17اکتوبر (اے پی پی) چین اٹی پاکستان نا سفیر نغمانہ ہاشمی پارینے کہ پاکستان و چین نا نیام اٹ ہڑتوم آ کنڈآتا واپار نا کچ 19-08 ارب ڈالر اسکان سرمسنے و ہڑتوم آ ملک آک ہڑتوم آ کنڈآتا واپار اٹی ودکی کن پرعزم ءُ ۔ داہیت ءِ او چینی اخبار چائنا ڈیلی ٹی شینک مروک آ آرٹیکل اٹی پارینے ۔ نغمانہ ہاشمی تینا آرٹیکل اٹی نوشتہ کرینے کہ دفاعی پیدوار نا بشخ اٹی ہڑتوم آ ملک آتا اسیجا ڈٹ آتیا عملدرآمد برجاءِ ۔ داٹی الخالد بینک و جے ایف 17تھنڈر جنگی جہاز جوڑ کننگا ۔ سفارتی محاذ آ ہڑتوم آ ملک آک ملٹی لیٹرلزم ءِ مون آ دننگ و اقوام متحدہ نا چارٹر آ عملدرآمد کن پرعزم ءُ ۔ پاکستان و چین نا نیام اٹ تعلقداری و کمکاری نا دنگ اٹی ودکی مننگ ءِ ۔ ہڑتوم آ ملک آتا نیام اٹ سائنس اینڈ ٹیکنالوجی ، راجی و اقتصادی بشخ و پرامن مسخت آتے کن جوہری ٹیکنالوجی نا بشخ آتے ٹی کمکاری برجاءِ ۔ نغمانہ ہاشمی پارے کہ ہڑتوم آ ملک آتا نیام اٹ تعلقداری تا ماسک دودوربیدہ و تاریخ اٹی گنڈوک ءُ ۔ پاکستانی سفیر پارے کہ داوخت چین نا بڑزکو انگا یونیورسٹی تیٹی 28ہزار آن زیات پاکستانی طالب علم خواننگ ءُ ، ہنداوڑ چینی طالب علم آک پاکستانی تعلیمی ادارہ غاتے ٹی خواننگ ءُ ۔ چین وپاکستان نا نیام اٹ السی کہول آ رابطہ غاتے ٹی ہم ودکی مننگ ءِ ۔ داوخت غٹ آن زیات چین نا شاری پاکستان آ بننگ ءُ ۔ پاکستانی سفیر پاک چین اقتصادی راہداری (سی پیک) ءِ ہڑتوم آ ملک آتانیام اٹ تعلقداری تے اسہ اہم ءُ موڑ اس گوندسا پارینے کہ دا قدیم شاہراہ ریشم نا احیاءِ ۔ زمانہ قدیم آن چینی پوریاگر آک ہنداکسر تیان یورپ نا کنڈاواپاری کارروان تے دیرہ کارہ ۔ اوپارے کہ سی پیک نا رداٹ پاکستان اٹی بجلی نا پیدوار و ترسیلی ڈٹ آتا اولیکو مرحلہ غا عملدرآمد نا بنامسنے ۔ داٹی بنداوی پنجر نا ڈٹ دُن کہ شاہراہ ، ریلویز، بالی پٹ، بندرگاہ، گیس پیپ لین و آپٹک فائبر نا ڈٹ آتے اپ گریڈ کننگا ۔ سی پیک نا ارٹ میکو مرحلہ ٹی راجی و اقتصادی شونداری و پوسکن آ ملازمت آتا پیدوار آ چکار کننگک ۔ ہنداوڑ خصوصی اقتصادی زون جوڑ کننگ انگ ءِ ہراڑے چینی زرکار آتون اسیجا ڈٹ آتا است بڈی ءِ کننگک ۔ پاکستانی سفیر پارے کہ کشت وکشار پاکستان نا معیشت نا مخ انا ملی ءِ ۔ پاکستان و چین نا نیام اٹ کشت وکشار نا بشخ اٹی کمکاری برجاءِ ۔ اوپارے کہ صدر شی جن پنگ نا بیلٹ اینڈ روڈ و وزیر اعظم پاکستان نا پوسکن آ پاکستان نا وژن اٹی یکسانیت خننگک ۔ وزیراعظم عمران خان سی پیک ءِ نئے بیرہ پاکستان بلکن مچ آ ڈیہہ کن گیم چینجر اس سرپند کیک ۔ سی پیک پاکستان و چین ءِ فعال و گچین اقتصادی شریدارثابت کرینے ۔ اوپارے کہ علاقائی حالیت آتارداٹ چین وپاکستان نا نیام اٹ پالیسی نا کہول آ ہم گرنچی ءِ ۔ اوپارے کہ پاکستان و چین نا نیام اٹ آزموندہ سنگتی و تین پہ تینی تعلقداری ءِ ۔ ہڑتوم آ ملک آتا نیام اٹ سدابہار سنگتی و اسٹریٹجک پارٹنر شپ برجاءِ و آخبت اٹی ہڑتوم آ ملک آتا نیام اٹ تعلقداریک پین مون آ کارہ ۔
