اسلام آباد ۔ 16 اکتوبر (اے پی پی) دری معاملہانی بنجاہی وزیر شاہ محمود قریشی ءَ گوشت کہ تاپی گیس پاءپ لائن منصوبگ ءَ چہ توانائی ءِ گیش بوتگیں ضلورتءَ را پیلو کنگ ءِ تہ کمک رسیت ۔ آہاں اے گپ چار شمبے ءَ ادا ترکمانستان ،اوگانستان،پاکستان،بھارت (تاپی) پاءپ لین کارپوریشن لمیٹڈ ءِ سی ای او ءُُ چیئرمین مراد امانوو ءِ گوما گند ءُُ نند ءِ درگت ءَ گپ ءُُ تران ءِ تہ کتگ ات ۔ گند ءُُ نند ءِ تہ دری کارانی وزیر ءَ را ترکمانستان،اوگانستان،پاکستان ءُُ انڈیا گیس پاءپ لین منصوبگ ءِ دیمروئی ءَ چہ ھم سرپد کتگ ۔ سی ای او تاپی کمپنی ءَ دری معاملہانی بنجاہی وزیر ءَ را گوشت کہ مہماندار حکومت ءِ نیمگا چہ اے معاہدہ ءَ را گڈی دروشم دیءگ ءِ ھاترا پاکستان ءُُ تاپی کمپنی ءِ میان ءَ گپ ءُُ تران سوبمندی ءَ گوں برجاہ انت ۔ اے موہ ءِ سرا دری معاملہانی وزیر شاہ محمود قریشی ءَ گوشت کہ تیل ءُُ گیس ءِ فراوانی ءِ رکھگ ءَ را سدکی جوڈ کنگ مئے اولی دلگوشی ءَ ھوار انت ۔ توانائی ملکی معیشت ءَ را دیما برگ ءِ ھاترا باز ھاس انت اے ھاترا حکومت معاشی دیمروئی ءِ ھاترا ھاٹیگ ءِ تک ءِ سرا ھاسیں دلگوشی دیءگ انت ۔ دری کارانی وزیر ءَ گوشت کہ تاپی گیس پاءپ لین منصوبگ ءَ چہ ھاٹیگ ءِ گیش بوتگیں ضلورت ءَ را پیلو کنگ ءَ کمک رسیت ۔ دری کارانی وزیر ءَ ڈل ءَ را تاپی گیس لین منصوبگ ءِ سرا زوت وڈ ءُُ پیم ءَ را سدکی جوڈ کنگ ءُُ ترکمانستان ءِ گوما توانائی ءِ تک ءِ پراھی ءِ ھوالہ چہ حکومتی جزم ءِ یقین داتگ ۔
