وزیر مملکت پارلیمانی امور علی محمد خان نا نجی نیوز چینل تون گپ و تران

حکومت غٹ وڈی خور عنصر آتا بے پرخ احتساب کرفنگ کن پرعزم ءِ

اسلام آباد ۔ 16 اکتوبر (اے پی پی) وزیر مملکت پارلیمانی امور علی محمد خان پارینے کہ جمہوری حکومت ءِ بلیک میل کننگ نا کوشست آتے سگنگ پننگک، ملک اٹی بے پرخ احتساب نا عمل اٹی اڑاند ودی کروک آ بندغ آتے مایوسی تون مون تروئی تمک ۔ چارشنبے نادے آ اسہ نجی نیوزچینل اسے تون گپ و تران کرسا وزیر مملکت اپوزیشن ءِ تنقید نا نشانہ کرے و جمعیت علماء اسلام (ف) انا سروک ءِ بلیک میل کننگ نا پالیسی آ خبڑدار کرے وپارے کہ دانا بھرمک بھاز خطرناک مریرہ ۔ اوپارے کہ وزیراعظم کشمیر نا ویل ءِ جہانی کہول آ تالان و مقبوضہ علاقہ ٹی مسلمان تا برخلاف بھارتی بیدادی ءِ پاش کرینے ۔ اوپارے کہ چندی بشخ آتے ٹی بھلو اصلاحات و کانود سازی کننگک ولے کرپٹ مافیا نا برخلاف جہدءِ ہم برجاتخنگک ۔ وزیر مملکت پارے کہ پاکستان مسلم لیگ (ن) و پاکستان پیپلزپارٹی نا سیاست نا ہچ ءُ نظریہ اس اف، الس وونٹ انا کمک اٹ اوفتا سیاست ءِ بے نقاب کرینے ۔ اوپارے کہ پاکستان پیپلزپارٹی و پاکستان مسلم لیگ (ن) کیہی دہائی اسکان ملک آ حکومت کریر ولے اوفک الس نا راجی آسراتی و ملکی شونداری کن ہچ اس کتوس و دانا جاگہ غا وام تا بھاز بھلو بھاریم اس الس آ تخانو ۔ اوپارے کہ اپوزیشن جماعت آتا رویہ شرمناک ءِ ۔ اوپیدوار کرے کہ عمران خان نا مخلص سرکڑدہ ہی ٹی پاکستان تحریک انصاف نا حکومت غٹ وڈی خور عنصر آتا بے پرخ احتساب کرفنگ کن پرعزم ءِ ۔ اوپارے کہ جے یو آئی (ف) نا سروک مولانا فضل الرحمان نا نام نہاد آزادی مارچ کشمیری تا آجوئی کن آخا بلکن قومی خزانہ ءِ لٹ وپل کروک آتا مخ تفی کن ءِ ۔ اوپارے کہ کانود ہر اسٹ آ اسہ وڑ لاگومریک، جے یو آئی (ف) نا سروک تینا جندی مسخت آتا دوئی کننگ کن ملک اٹی دھرنہ و دوبہ غاتا سیاست نا زموار ءِ ۔ وزیراعظم عمران خان نا اولیت ملک اٹی وڈی خوری نا چٹفنگ و میرٹ آ مبنی جمہوریت ءِ مون آ دننگ نا ءِ ۔ علی محمد پارت کرے کہ حکومت ہچ کس تون سمجھوتہ کپک ، ہراخلقت ریاست نا رٹ ءِ چیلنج و کانود ءِ تینا دوٹی ہلیرہ اوفتے ہچ وڑنا رعایت تننگپک ۔