انسانی حق انا سرحال ءِ نصاب اٹ اوار کننگ انگ ءِ، ڈاکٹر شیریں مزاری

اسلام آباد ۔ 16اکتوبر (اے پی پی) بنجائی وزیر انسانی حق ڈاکٹر شیریں مزاری پارینے کہ انسانی حق انا سرحال ءِ نصاب اٹ اوار کننگ انگ ءِ ۔ استاد و لمہ و باوہ چناتا تعلیم تون تربیت آہم خصوصی چکار تخر ، وزارت چناتے تون جنسی بیدادی نا توننگ نا بابت آگاہی مہم سرسہبی اٹ برجاءِ ۔ چارشنبے نادے آ ایف سیون ون ماڈل اسکول طالبات اٹی دود آن تران کرسا اوپارے کہ ننا وزارت چناتے تون بدسلوکی و جنسی بیدادی نا توننگ کن آگاہی مہم سرسہبی اٹ بنجائی دارالحکومت نا تعلیمی ادارہ غاتے ٹی جاری ءِ ۔ اوپارے کہ چناتے تون مروک آ جنسی بدسلوکی یا ہروڑنا غاو اکن وزارت نا ہیلپ لین 1099 آ رابطہ کبو تانکہ دمدستی وڑاٹ ایکشن ہلنگ مرے ۔ اوپارے کہ چناتے تون مروک آ بیدادی تا توننگ کن راج انا ہر بندغ ءِ تینا کڑد ءِ ادا کروئی مریک و دامون ایمون نا چاگڑد آ نظر تخوئی مریک انتئے کہ درندہ صفت عنصر آک تینا خواہش آتا پوروی کن ہرگلی، محلہ و شار اٹی موقع پٹرہ ۔ اوپارے کہ چناتا تعلیم و تربیت اٹی لمہ و باوہ و استاد آتا اہم ءُ کڑد اسے ، اوفک تینا چناتیا بایدے سخت نظر تخر و بے سوب اوفتے اُراغان پیش تمنگ کن الیپس ۔ اوپارے کہ داسہ وخت بسنے کہ چناتے جنسی بیدادی و بدسلوکی نا بارواٹ پورو معلومداری مرے و لمہ و باوہ دابابت تینا چناتے تون ہیت وگپ کیر تانکہ او تینا رکھ ءِ کننگ کیر ۔ ڈاکٹر شیریں مزاری پارے کہ انسانی حق ءِ نصاب اٹی انسانی حق خاص کر چناتا حق ءِ اوار کننگ انگ ءِ، وزیراعظم عمران خان چناتیا جونی بیدادی آ پابندی خلکونے داسہ چناتیا دُوہرفنگ سزا تننگ مفک ۔ داکان مست دود اٹی طالب علم آک چناتا حق انا سرحال آ تقریر ہم کریر ۔ داکان بیدس وزارت انسانی حق انا کنڈآن جنسی بیدادی تا توننگ و آگاہی نا بابت ڈاکومینٹری ہم پیش کننگا ۔