وزیراعظم نا سلاہکار واپار عبدالرزاق داءود نا مصر انا واپاری ڈل اتون اوڑدہی ٹی گپ و تران

مصر پاکستان آن سیمنٹ و سرجیکل ازباب درآمد کننگ کیک، ہڑتوم آ ملک آتا تین پہ تینی واپار و زرکاری نا کچ ءِ ودفنگ نا گرج ءِ

اسلام آباد ۔ 16اکتوبر (اے پی پی) وزیراعظم نا سلاہکار واپار عبدالرزاق داءود پارینے کہ مصر پاکستان آن سیمنٹ و سرجیکل ازباب درآمد کننگ کیک، ہڑتوم آ ملک آتا ہڑتوم آ کنڈآتا واپار و زرکاری نا کچ کم ءِ ہرادے ودفنگ نا گرج ءِ ۔ داخیال آتا درشانی ءِ او چارشنبے نادے آ مصر انا واپاری ڈل اتون اوڑدہی ٹی کرے ہرا احمد انتر نا کماشی ٹی وزارت واپار نا دورہ ءِ کریر ۔ پاکستان اٹی تعینات مصر انا سفیر احمد فدیل ہم ڈل اتون اوار ئسک ۔ داوخت آ سیکرٹری واپار سردار احمد نواز سکھیرا و وزارت واپار نا بڑزکو کمامدارآک ہم ساڑی ئسر ۔ سلاہکار واپار عبدالرزاق داءود ڈل ءِ بخیر کرسا پارے کہ پاکستان و مصر انا بھاز جوان ءُ تعلقداری اسے، ہڑتوم آتا ہڑتوم آ کنڈآتا واپار و زرکاری نا کچ کم ءِ ہرادے ودفنگ نا گرج ءِ ۔ سلاہکار واپار پارے کہ پاکستانی سرجیکل ازباب آک بھلو کچ اسے ٹی برآمد مریرہ ۔ مصر پاکستان آن سیمنٹ و سرجیکل ازباب درآمد کننگ کیک ۔ اوڑدہی ٹی ڈل ہڑتوم آ کنڈآتا واپار و زرکاری ءِ پین ودفنگ آ امنا کریر ۔ اوڑدہی ٹی ڈل انا سروک احمد انتر پارے کہ جوائنٹ بزنس کونسل نا ٹہیفنگ آن واپار و زرکاری ءِ مون آ دننگک ۔