اسلام آباد اٹی تعینات بھارت نا ڈپٹی ہائی کمشنر آہلووالہ نادفترخارجہ ٹی بٹنگ انگ
اسلام آباد ۔ 16اکتوبر (اے پی پی) اسلام آباد اٹی تعینات بھارت نا ڈپٹی ہائی کمشنر آہلو والہ ءِ اسہ وار ولدا دفترخارجہ غا بٹنگسا بھارتی فورس آتا کنڈآن کنٹرول لین آ جنگ بندی نا بے خار خلاف ورزی تیا برانز ءِ ریکارڈ کرفنگا ۔ ترجمان دفترخارجہ نا رداٹ ڈائریکٹر جنرل (سویلی ایشیا و سارک) ڈاکٹر محمد فیصل بھارتی ڈپٹی ہائی کمشنر گوروف آہلو والہ ءِ چارشنبے نادے آ دفترخارجہ غا بٹنگا و 15اکتوبر آ بھارتی فورس آتا کنڈآن کنٹرول لین آ جنگ بندی نا بے خار خلاف ورزی تا ترندی اٹ مذمت ءِ کننگا ۔ بھارتی فورس آتا کنڈآن چارشنبے نادے نیزہ پیر سیکٹر اٹی بے خار سم کاری ٹی کرنی خلق اناہنکینی مسہ بے گناہ شاری 55سال انا غلام قادر ولد لال دین، دُوانزدہ سال انا مریم بی بی و دہ سال انا حیدر علی شہید وخت اس کہ زالبول و چناتے تون اوار پین 8 بندغ ٹھپی مسر ۔ ترجمان نا پاننگ ءِ کہ بھارتی فورس ایل او سی و ورکنگ باءونڈری آ شاری آبادی ءِ مارٹر و خودکار سلہہ غاتے اٹ پدریسہ نشانہ کننگ ءِ ۔ اوپارے کہ دانستہ وڑاٹ شاری تے نشانہ کننگ است ہسون و انسانی وقار و انسانی حق انا جہانی کانود نا خلاف ورزی ءِ ۔ ترجمان پارے کہ بھارت نا کنڈآن جنگ بندی نا خلاف ورزی تیان علاقائی امن و سلامتی ءِ خطرہ ءِ ہرا تذویراتی غلط فہمی نا سوب مننگ کیک ۔ اوبھارت آ زور شاغا کہ او 2003ء نا جنگ بندی معاہدہ نا شرف ءِ کے ۔ جنگ بندی نا خلاف ورزی تا ساڑی آ ایلو واقعہ غاتا جاست وپاست ءِ کرفے، تینا فورس آتے جنگ بندی نا حقی وڑاٹ شرف ءِ کننگ نا پارت کے و کنٹرول لین و ورکنگ باءونڈری آ امن ءِ برقرار تخے ۔
