اسلام آباد ۔ 16اکتوبر (اے پی پی) صدر مملکت ڈاکٹر عارف علوی پارینے کہ فاصلاتی ذریعہ اٹ تعلیم ءِ مون آ دننگ وخت انا اہم ءُ گرج اس مسنے، انٹرنیٹ نا ذریعہ رابطہ و علم انا تالان کننگ اٹ انقلابی بدلی بسنے ، شونداری ٹی اوار مننگ کن پوسکن آ دور انا خواست آتون ہم گرنچ مننگ المی ءِ ۔ داخیال آتا درشانی ءِ او لاہور اٹی اوپن یونیورسٹی نا ایسوسی ایشن نا 33می سالانہ کانفرنس آن تران کرسا کرے ۔ صدر مملکت پارے کہ فاصلاتی ذریعہ تعلیم نا مون آ دننگ وخت انا اہم ءُ گرج اس مسنے داڑان وخت و خڑچ آتا بچت مریک ۔ اوپارے کہ ہرابندغ آک یا قومک ہر دور انا گرج و خواست آتا ادراک ءِ کپسہ اوشونداری نا کسر اٹی پدی سلرہ ۔ اوپارے کہ علم انا اعتبار اٹ تاریخ اٹی سند آتا بھاز بھلومرتبہ و اہمیت اس ئس ولے پرنٹنگ پریس نا ایجاد و اوکان پد صنعتی انقلاب اٹی علم انا مون آ دننگ نا بشخ اٹی بھاز بھلو بدلی اس بس ۔ ہنداوڑ انٹرنیٹ لس مننگ آن پد علم انا دوئی کننگ بھاز آسان مسنے ۔ صدر مملکت پارے کہ انٹرنیٹ نا کمک اٹ تینا پسندیدہ کتاب آتسکان آسان رسینگ ہرا ممکن مریک ، دا علم انا دوئی کننگ و اونا تالان کننگ نا بھاز بھلو ذریعہ اس ثابت مسنے ۔ صدر مملکت پارے کہ ساڑی دور اٹی مینوفیکچررز ، فروخت کنندگان و صارف آتا نیام اٹ رابطہ بھاز گچین مسنے، دا بدلی تے مون آ تخسا ورناک تینے تعلیم و کسب آن آراستہ کیر ۔
