صدر مملکت ڈاکٹر عارف علوی نا برطانوی دارالامراء نا باسک ضمیر اے چوہدری نا شرف اٹی تروک آ اِرغ آن تران

پاکستان زرکاری کن رکھ ءُ ملک اسے، برطانوی شاہی جوڑہ نا دورہ پاکستان آن درملکی زرکارآتا پت بحال مریک

اسلام آباد ۔ 16اکتوبر (اے پی پی) صدر مملکت ڈاکٹر عارف علوی پیشن نا ملک اٹی رہینگوک پاکستانی تا ملکی شونداری کن خذمت آتا ستاءِ کرسا پارینے کہ پاکستان زرکاری کن رکھ ءُ ملک اسے، شاہی جوڑہ نا دورہ پاکستان آن درملکی زرکار آتا پت بحال مریک، وزیراعظم عمران خان وار وار ڈیہہ ٹی امن و نیزگاری ءِ چٹفنگ نا ہیت ءِ کیک، پوریا گر آک کٹیا تون اوار اوار السی بھلائی نا ہم بایدے خیال ءِ تخر ۔ داخیال آتا درشانی ءِ او تدوک آ نن برطانوی دارالامراء نا باسک و پاکستانی زرکار ضمیر اے چوہدری نا شرف اٹی تروک آ اِرغ آن تران کرسا کرے ۔ صدر مملکت پارے کہ اودے و مچ آ قوم ءِ ضمیر اے چوہدری آ گمرءِ ، اوتینا خواری ، مخیرانہ سرجز و کاروباری سرسہبی تیان پن اس کٹا ۔ اودے برطانوی دارالامراء ٹی تعیناتی آ مبارکباد پیش کیوہ ۔ صدر مملکت پارے کہ بیسٹ وے گروپ و یونائیٹڈ بینک لمیٹڈ اونا کماشی ٹی پاکستان اٹی زرکاری کروک آ بھلا پڑک ءِ ۔ اوپارے کہ پاکستان اٹی رکھ زرکاری نا وارخواہیک ودنگ ءُ ۔ اوبرطانوی شاہی مہمان تا حوالہ ءِ ترسا پارے کہ شہزادہ ولیم و اونا اُرائی کیٹ مڈلٹن پاکستان اٹی مخیرانہ سرجزآتے ٹی بشخ ہلنگ اٹ پبی آمادگی ظاہر کرینو ۔ اوبریسٹ کینسر نا بابت آگاہی مہم نا ستاءِ کرینو ۔ داکان مست برطانوی ملکہ الزبتھ و لیڈی ڈیانا ہم پاکستان نا دورہ ءِ کریسر ۔ برطانوی شاہی مہمان تا دورہ پاکستان نا بابت دنیا ءِ داکلہو ملک کہ پاکستان سیکورٹی نا لحاظ اٹ رکھ ءُ ملک اسے، داڑان پاکستان اٹی زرکارآتا پت بحال مریک ۔ عارف علوی پارے کہ پوریاگر آک کٹیا تون اوار اوار السی بھلائی نا ہم بایدے خیال ءِ تخر، شون ہلوک ملک آتے ٹی نیزگاری ٹی ودکی مننگ ءِ، وزیراعظم عمران خان بھارت تون اوار ڈیہہ نا غٹ ملک آتون وار وار امن و نیزگاری نا چٹفنگ نا ہیت ءِ کرینے ۔ اوپارے کہ بیسٹ وے گروپ و یونائیٹڈ بینک لمیٹڈ پاکستان نا چندی بشخ آتے ٹی مخیرانہ سرجزآتے ٹی پبی کڑد ادا کننگ ءُ ہراڑا اوفتا منت وار اُن ۔ داوخت آ چیف ایگزیکٹو آفیسر بیسٹ وے گروپ لارڈ ضمیر اے چوہدری ، چیف ایگزیکٹو آفیسر یونائیٹڈ بینک لمیٹڈ سیماکامل و ڈپٹی برطانوی ہائی کمشنر ئسک ہم تران کریر ۔ داوخت آ بنجائی وزیر پٹرولیم غلام سرور خان، بنجائی وزیر سائنس و ٹیکنالوجی فواد چوہدری، بنجائی وزیر بحری امور علی زیدی، بنجائی وزیر توانائی عمر ایوب، پاکستان تحریک انصاف نا سینئر راہشون جہانگیر ترین تون اوار پارلیمنٹ نا باسک و پوریا گر کمیونٹی نا راہشونک ہم ساڑی ئسر ۔