وزیراعظم عمران خان نا سعودی سرکڑدہ غاتون اوڑدہی تیٹی فوجی جھیڑہ غان پاناد و غٹ کڑدہ غاتا نیام اٹ تعمیری رابطہ نا اہمیت آ زور
مقبوضہ کشمیر اٹی جاری مواصلاتی پابندی، پدریسہ لاک ڈاءون و کرفیو تون اوار انسانی حق انا سنگین حالیت، انسانی تنکی آن معلومدار کرے
سعودی سرکڑدہ غاتا پاکستان تون خڑکی تعلقداری ، واپار، توانائی ، سلامتی و دفاع تون اوار غٹ بشخ آتے ٹی ہڑتوم آ کنڈآتا کمکاری ءِ مون آ دننگ نا عزم انا درشان
اسلام آباد;223;ریاض ۔ 16اکتوبر (اے پی پی) وزیراعظم عمران خان 15اکتوبر آ سعودی عرب نا دورہ ءِ کرے و خادم الحرمین الشریفین شاہ سلمان بن عبدالعزیز السعود و ولی عہد شہزادہ محمد بن سلمان تون جتا جتا اوڑدہی کرے ۔ دا دورہ ڈیہہ ٹی امن و سلامتی کن وزیراعظم نا کوشست آتا بشخ ئس ۔ وزیراعظم نا سعودی عرب نا دورہ نا ایسر آ جاری مروک آ اعلامیہ نا رداٹ اوڑدہی تیٹی وزیراعظم پارے کہ پاکستان و سعودی عرب نا تعلقداری بے کچ کڑمب و کثیر الجہت ءُ ۔ وزیراعظم توانائی و زرکاری نا بشخ آتے ٹی کمکاری، ہڑتوم آ کنڈآتا واپار و الس نا نیام اٹ رابطہ غاتے پین مون آ دننگ نا عزم انا درشانیءِ کرے ۔ خلیج نا حالیت آتا ذکر ءِ کرسا وزیراعظم فوجی جھیڑہ غان پاناد و غٹ کڑدہ غاتا نیام اٹ جوڑ جاڑی رابطہ غاتا اہمیت آ زور شاغا ۔ وزیراعظم عمران خان پرامن ذریعہ اٹ اختلافات و جھیڑہ غاتا ایسری و بے چیٹی تیٹی کمتی کن کمکاری نا کوشست آتے کن پاکستان نا آمادگی نا درشانی ءِ کرے ۔ سعودی سرکڑدہ غاک پاکستان تون خڑکی تعلقداری تا عزم انا درشانیءِ کریر و واپار، توانائی ، سلامتی و دفاع تون اوار غٹ بشخ آتے ٹی ہڑتوم آ کنڈآتا کمکاری ءِ مون آ دننگ نا عزم انا درشانی ءِ کریر ۔ سعودی عرب نا کنڈآن کشمیر نا ویل آ پاکستان نا مخ تفی و بے چیٹی تیٹی ودکی آن پاناد و اسہ پرامن ایسری اسے نا اہمیت نا درشانی ءِ کننگا ۔ سعودی سرکڑدہ غاک ڈیہہ ٹی امن و سوگوی ءِ مون آ دننگ و بے چیٹی تیٹی کمتی کن وزیراعظم عمران خان نا مخلصانہ کوشست آتا ستاءِ کریر ۔ سعودی سرکڑدہ غاتون جامع و جوڑ جاڑی گپ و تران کننگا ۔ معاملہ غاتا ویل ویچڑی و چیلنج آتا رداٹ کڑدہ غاک داعمل ءِ مون آ دننگ کن خڑکی رابطہ و سلابت ءِ برقرار تخنگ آ امنا کریر ۔ وزیراعظم سعودی سرکڑدہ غاتے مقبوضہ جموں و کشمیر اٹی 70 آن زیات دے آن جاری مواصلاتی پابندی، پدریسہ لاک ڈاءون و کرفیو تون اوار انسانی حق انا سنگین حالیت و انسانی تنکی آن معلومدار کرے ہرانا سوب آن 80 لکھ آن زیات کشمیری تا زند بھاز زہمی مسنے و داڑان علاقہ ٹی امن و سلامتی ءِ بھاز خطرہ مون تروک ءِ ، وزیراعظم عمران خان نا اینخو نا سال اٹی سعودی عرب نا دا مسٹ میکو دورہ ئس ۔ پاکستان و سعودی عرب نا تعلقداریک تین پہ تینی پت ، ہم گرنچی ، خڑکی کمکاری و اسہ ایلو نا مخ تفی نا روایت آتا بنداوآ سلوک ءُ ۔ وزیراعظم داہیت انا درشانی ءِ کرے کہ پاکستان مدام سعودی عرب تون ہم کوپہ سلک ۔ وزیر خارجہ شاہ محمود قریشی ، وزیراعظم نا خصوصی کمکار اوورسیز پاکستانیز سید ذوالفقار عباس بخاری و ایلو بڑزکو کمامدارآتون اوار بڑزکو کہول انا ڈل ہم وزیراعظم تون اوار ئسر ۔
