وزیراعظم عمران خان تون جہانی اسلامی بینک انا چیف ایگزیکٹو و پاک قطر تکافل نا چیئرمین شیخ علی بن عبداللہ ثانی الثانی نا اوڑدہی

پاکستان اٹی آخبت اٹی تینا بزنس و زرکاری نا ڈٹ آتا بارواٹ معلومدار کرے

اسلام آباد ۔ 15اکتوبر (اے پی پی) وزیراعظم عمران خان دا عزم انا درشانی ءِ کرینے کہ پاکستان ڈیہہ تون سوگو ایلمی تعلقداری و خڑکی کمکاریءِ اہمیت ایتک ۔ وزیراعظم خاص کر جون 2019ء ٹی قطر انا امیر نا دورہ پاکستان آن پد ہڑتوم آملک آتا نیام اٹ تعلقداری تیٹی است جمی نا درشانی ءِ کرینے ۔ وزیراعظم داہیت ءِ سے شنبے نادے آ داڑے جہانی اسلامی بینک انا چیف ایگزیکٹو و پاک قطر تکافل نا چیئرمین شیخ علی بن عبداللہ ثانی الثانی تون اوڑدہی ٹی گپ و تران کرسا پارے ۔ شیخ علی بن عبداللہ وزیراعظم ءِ پاکستان اٹی آخبت اٹی تینا بزنس و زرکاری نا ڈٹ آتیان معلومدار کرے ۔ اووزیراعظم ءِ پارے کہ او پاکستان اٹی میزبانی نا صنعت اٹی زرکاری نا ارادہ تخک و دا بابت ڈٹ بندی بروک آ مرحلہ غاتے ٹی ءِ ۔ اوپارے کہ پاک قطر تکافل نا پاکستان اٹی 70شاخ ءُ و داسہ اوفتا پڑک پاکستان اٹی ریئل اسٹیٹ ہاءوسنگ و میزبانی نا صنعت اٹی زرکاری ٹی است خواہی ہلنگ ءِ ۔ او ڈیہہ ٹی امن و سلامتی کن وزیراعظم عمران خان نا کوشست آتا پبی وڑاٹ ستاءِ کرے و دارداٹ وزیراعظم عمران خان نا دورہ سعودی عرب کن نیک است خواہی تا درشانی ءِ کرے ۔ وزیراعظم عمران خان داوخت آپارے کہ پاکستان قطر اتون ایلمی آ مبنی سوگو تعلقداری و خڑکی کمکاری ءِ مثبت اہمیت ایتک ۔ وزیراعظم اینخو سال جون اٹی امیر قطر نا دورہ پاکستان آن پد ہڑتوم آ ملک آتا نیام اٹ تعلقداری تیٹی بڑزی تیا است جمی نا درشانی ءِ کرے ۔