کنوینئر سب کمیٹی داخلہ سینیٹر کلثوم پروین نا سب کمیٹی نا دیوان اٹی گپ و تران

بلدیاتی گچین کاری تیان مست چندی سوب آتا بنا آ بلوچستان اٹی بلاک کروک ہندی بندغ آتا شناختی کارڈ آتا جاری کننگ ءِ المی کننگے ، سینیٹ نا سب کمیٹی داخلہ نا نادرا کمامدارآتے پارت

کوءٹہ ۔ 15اکتوبر (اے پی پی) سینیٹ نا سب کمیٹی داخلہ نیشنل ڈیٹا بیس اینڈ رجسٹریشن اتھارٹی ءِ پارت کرینے کہ بلدیاتی گچین کاری تیان مست جتا سوب آتا بناء آ بلوچستان اٹی ہندی بندغ آتا بلاک کروک قومی شناختی کارڈ آتا جاری کننگ ءِ المی کننگے تانکہ ہندی بندغ آتا اسہ بھلو کچ اس بلدیاتی گچین کاری تیٹی تینا حق رائے دہی ءِ کاریم اٹ اتنگ کیر ۔ دیوان اٹی نادرا کمامدارآتا کنڈآن سینیٹ نا سب کمیٹی ءِ پاننگاکہ بلوچستان اٹی جم وڑاٹ 28 ہزار 920 شناختی کارڈ درکار دستاویز آتا پورو مفننگ نا سوب آن بلاک ءُ بلوچستان اٹی نادرا نا ہژدہ دفتر اوغانستان و ایران بارڈر نا خڑک شار، ژوب، قلعہ سیف اللہ، نوشکی، قلعہ عبداللہ، دالبندین، تربت ، گوادر ، چمن و ایلو علاقہ غاتے ٹی جوڑ ءُ ہراڑے درملکی تے شناختی کارڈ انا جاری کننگ ءِ توننگ کن پک کننگ نا عمل نا مروجہ کانود نا اطلاق سختی اٹ کننگک ہندی بندغ آتا درستی راستی و پک کننگ نا عمل ءِ آسان کننگ ک ہر ضلع نا ڈپٹی کمشنرآتا سرکڑدہ ہی ٹی ڈی اے سی جوڑ ءِ ۔ سینیٹ نا سب کمیٹی داخلہ نا دیوان کنوینئر کمیٹی سینیٹر کلثوم پروین نا کماشی ٹی سے شنبے نادے آ بلوچستان اسمبلی نا کمیٹی روم اٹی اڈ ہلک دیوان اٹی سینیٹر ز باسک صوبائی اسمبلی نادرا و محکمہ داخلہ نا کمامدارآک ہم بشخ ہلکر ۔ دیوان اٹی محکمہ داخلہ نا جوائنٹ سیکرٹری دلشاد احمد پارے کہ پاکستان نا شناختی کارڈ آ گڑاس ملک آتے ٹی گڑاس بندغ برخلاف کانود گام گیج آتے ٹی ملوث مسنو ، ہرانا سوب آن قومی اسمبلی نا پارلیمانی کمیٹی شناختی کارڈ انا جاری کننگ و پک کننگ نا بابت وڑوڈول اس طے کرینے و ڈپٹی کمشنر نا کماشی ٹی ضلعی کہو ل آ با اختیار کمیٹی اس جوڑ کننگانے اگہ دا ضلعی کمیٹی نا دیوان تواتر اتون مرسا کہ تو بلاک شناختی کارڈ آتا جاری کننگ مرسا کیک و الس ءِ مشکل آتیان نجات ملنگ کیک ڈائریکٹر جنرل نادرا بلوچستان کرنل عابد دیوان ءِ پارے کہ بلوچستان نا بارڈر تون ایب و کیب انا علاقہ غاتے ٹی درملکی بندغ آتے شناختی کارڈ انا جاری کننگ ءِ توننگ کن پک کننگ نا عمل آ پورو وڑاٹ عملدرآمد ءِ المی کننگک اوغان باہوٹ شناختی کارڈ آتا جاری کننگ کن ہندی خلقت نا فیملی ٹریز اٹی انٹری کرفرہ دُن انگا حالیت آک یقینا نادرا کن فریشانی اس مریرہ ولے نادرا تینا وڑاٹ درملکی تے شناختی کارڈ انا جاری کننگ ءِ توننگ کن پورو وڑاٹ پک کننگ نا غٹ راءج وڑوڈول آتے تینا کیک ڈی جی نادرا پارے کہ نادرا نا ملازم اسے نا برخلاف غاو آ راءج وڑوڈول نا رداٹ کارروائی کننگک اوپارے کہ نادرا پالیسی نا رداٹ پوسکن آ قومی شناختی کارڈ انا جاری کننگ ءِ آسان کننگ کن حکومت آسان شڑت درستی راستی کرفینے و اِرا شناختی کارڈ ہولڈر پوسکن درخواست تروک بندغ اسے نا تصدیق ءِ کننگ کیرہ ڈی جی نادرا بلوچستان پارے کہ بلوچستان اٹی زالبول آتا رجسٹریشن نا بابت مشکلات آک مون تروک ءُ دارداٹ سیاست دان سول سوساءٹی و غٹ تپہ غاتے تینا کڑد ادا کروئی مریک دیوان اٹی سینیٹر کلثوم پروین کنوینئر سب کمیٹی نادرا کمامدارآتے پارت کرے کہ بلوچستان نا الس ءِ قومی شناختی کارڈ انا جاری کننگ کن نادرا نا دفتر ، عملہ و موبائل رجسٹریشن وہیکلز آتے ٹی ودکی کننگے و الس ءِ مون تروک مشکل آتا ازالہ کن دمدستی گام گیج کننگے ، کنوینئر سب کمیٹی بلوچستان اٹی قومی شناختی کارڈ انا جاری کننگ نا بابت مشکل آتا چٹفنگ کن اسمبلی نا باسک و نادرا کمامدار و تعلقدار ادارہ غاتیا تالان کمیٹی اس جوڑ کرسا بیست و پنچ دے آن پد جاچ دیوان اس اڈتننگ نا پڑو ءِ کرے ۔ سینیٹ نا سب کمیٹی داخلہ بلوچستان اسمبلی نا باسک آتے پارے کہ نادرا نا بابت مون تروک ویل و اوفتا ایسری کن سلاہ نوشتہی وڑاٹ کمیٹی نا پگہ نا دیوان اٹ پیش کننگے تانکہ ایسر نا قابل سلاہ تیا عملدرآمد ءِ المی جوڑ کننگ مرے ، دیوان اٹی سینیٹر سردار شفیق ترین، بلوچستان اسمبلی نا اپوزیشن لیڈر ملک سکندر حیات، اسمبلی نا باسک میر احمد نواز بلوچ ، ملک نصیر شاہوانی ، نصراللہ زیرے ، نصیب اللہ مری ، مبین احمد خلجی، عبدالقادر نائل، ثناء اللہ بلوچ ، دنیش کمکار، شکیلہ نوید دہوار ، اختر حسین لانگو ، اصغر ترین ، ملک نعیم خان ، اکبر مینگل ئسک ساڑی ئسر ۔