وزیراعظم نا جان جوڑی آسراتی پروگرام نا رداٹ خیبر پختونخوا ٹی جنوری 2020ء آن جان جوڑی آسراتی کارڈ فراوان کننگ نا بناءِ کننگک

اسلام آباد ۔ 15اکتوبر (اے پی پی) وزیراعظم نا جان جوڑی آسراتی پروگرام نا رداٹ صوبہ خیبر پختونخوانا غٹ ضلع غاتے ٹی بے پرخ قومی شناختی کارڈتخوک خاہوت آتے ٹی جنوری 2020ء آن جان جوڑی آسراتی کارڈ فراوان کننگ نا بناءِ کننگک ۔ پروگرام نا رداٹ جان جوڑی آسراتی کارڈ اٹی 10لکھ 80 ہزار روپئی آن غٹ مرض آتا درمان کن جتا کننگانے ۔ محکمہ جان جوڑی خیبر پختونخوا و سٹیٹ لاءف نا نیام اٹ جان جوڑی آسراتی کارڈ انا فراوانی کن معاہدہ آخیریکو مرحلہ غاتے ٹی ءِ ۔ سے شنبے نادے آ خیبر پختونخوا نا ڈائریکٹر جان جوڑی ڈاکٹر ریاض تنولی پارینے کہ وزیراعظم جان جوڑی آسراتی پروگرام نا رداٹ خیبر پختونخوا نا غٹ ضلع غاتے ٹی وزیراعظم نا ویژن نا رداٹ قومی شناختی کارڈ تخوک آ خاہوت آتے ٹی جنوری 2020ء آن جان جوڑی آسراتی کارڈ فراوان کننگ نا بناءِ کننگ انگ ءِ دا بابت سٹیٹ لاءف انشورنس آف پاکستان تون معاہدہ آخیریکو مرحلہ غاتے ٹی ءِ ۔ اوپارے کہ صوبہ ٹی داکان مست 64درسد آبادی ءِ جان جوڑی آسراتی کارڈ مہالو آن فراوان کننگانے، داسہ سد درسد آبادی ءِ جان جوڑی آسراتی کارڈ انا فراوانی نا ڈٹ آ کاریم نا بناءِ کننگ انگ ءِ ۔ اوپارے کہ وزیراعظم نا جان جوڑی آسراتی پروگرام نا رداٹ مہالو جتا کروک پیسہ غاتے ہفت لکھ بیست ہزار روپئی آن ودفسا دہ لکھ ہشتاد ہزار روپئی کننگانے ہراڑان غٹ مرض آتا درمان ءِ کرفنگ مریک ۔ ریاض تنولی پارے کہ بروک آ سال صوبہ نا غٹ ضلع غاتے ٹی الس ءِ جان جوڑی آسراتی کارڈ فراوان کننگک ۔