سینیٹ نا سب قائمہ کمیٹی میری ٹائم افیئرز نا گوادر پورٹ آ دیوان اس مس دیوان نا کماشی ءِ قائمہ کمیٹی نا کنوینئر سینیٹر کہدہ بابر بلوچ کرے

کوءٹہ ۔ 14اکتوبر (اے پی پی) سینیٹ نا سب قائمہ کمیٹی میری ٹائم افیئرز نا گوادر پورٹ آ دیوان اس مس دیوان نا کماشی ءِ قائمہ کمیٹی نا کنوینئر سینیٹر کہدہ بابر بلوچ کرے، دیوان اٹی سینیٹر کہدہ محمد اکرم بلوچ تون اوار چیف کلیکٹر کسٹم، فائنانس اینڈ ڈویلپمنٹ ڈپارٹمنٹ نا کمامدارآک، چیئرمین گوادر پورٹ اتھارٹی، چینی کمپنی نا منتظمین و ایلو ادارہ غاتا بڑزکو آفیسر آک ساڑی ئسر ۔ دیوان اٹی سینیٹ نا قائمہ کمیٹی میری ٹائم افیئرز ءِ گوادر پورٹ ، گوادر فری زون و پاک اوغان ٹرانزٹ ٹریڈ انا تیاری تا بابت سرجم حوال تننگا ۔ داوخت آ سینیٹ نا قائمہ سب کمیٹی نا کنوینئر سینیٹر کہدہ بابر بلوچ نا پاننگ ئس کہ گوادر پورٹ آ پاک اوغان ٹرانزٹ ٹریڈ و ہروڑنا کارگوشپ ہینڈ لنگ کن غٹ تر بست و بند آتے پورو و گوادر پورٹ آ غٹ آسراتی دوئی، وخت اس کہ گوادر فری زون نا ٹوٹل 2003 ایکڑ ز رقبہ غا شونداری کاریم ترندی اٹ برجاءُ ہراکہ اینخو سال انا ایسر اسکان پورو مریرہ، داوخت آ فری زون انا شست ایکڑ رقبہ غا دفتر، اسٹوریج ہال و کولڈ اسٹور نا تعمیر نا کاریم پوروی نا آخریکو مرحلہ غاتے ٹی ءُ ۔ اوپارے کہ گوادر ایکسپریس وے آ ہم کاریم ترندی اتون برجاءِ ۔ ایکسپریس وے اسہ بھاز اہم ءُ پروجیکٹ اسے ہرانا پوروی آن پد گوادر پورٹ مکران کوسٹل ہائی وے اتون گنڈنگک ۔ کنوینئر قائمہ کمیٹی نا پاننگ ئس کہ اوغان ٹرانزٹ ٹریڈ ءِ گوادر پورٹ آن بناکننگ نا بابت ساڑی آ دے تیٹی اوغانستان نا کمامدارآتون حکومتی کہول آ معاملہ غاک طے مسنو منہ دے اٹی گوادر پورٹ آن اوغان ٹرانزٹ ٹریڈ بناکیک ۔ حکومت پاکستان ملکی و درملکی زرکارآتے گوادر پورٹ آ زرکاری کن گچین آسراتی و است چکوک مراعات ایتک ۔ اوپارے کہ سیکورٹی نا بابت گوادر پورٹ آ گچین گام گیج کننگانے ۔ اوپارے کہ حکومت پاکستان ایلم ملک چین انا کمک و کمکاری آن 12بلین روپئی نا خڑچ آن ڈسٹرکٹ گوادر نا کرکی شار جیونی ، پشکان و پسنی ٹی ٹیکنیکل سینٹرز ملک تانکہ ہموجاگہ نا ورناک دا ٹیکنیکل سینٹڑ آتیان فنی تعلیم حاصل کننگ کیر ۔ گوادر پورٹ آ پورٹ آپریشن سافٹ ویئر سسٹم، و فائبر آپٹیک نا خراب کارکڑدگی نا غاو تیا کنوینئر قائمہ کمیٹی سینیٹر کہدہ بابر بلوچ کسٹم ، گوادر پورٹ اتھارٹی وپاکستان ٹیلی کمیونیکیشن اتھارٹی نا کمامدارآتے پارت جاری کرسا پارینے کہ پورٹ آپریشن سافٹ ویئر سسٹم و فائبر آپٹیک نا کاریم ءِ اِراہفتہ ٹی پورو کرسا کنے رپورٹ کے ۔