بحری سیل و سواتی تا درستی راستی کن مشین ریڈ ایبل دستاویز ایم آر ایس آئی ڈی جاری کننگ کن 19ملین روپئی جتا کرینے، سینئر کمامدار وزارت بحری امور

اسلام آباد ۔ 14اکتوبر (اے پی پی) وزارت بحری امور بحری سیل و سواتی تا درستی راستی کن مشین ریڈ ایبل دستاویز ایم آر ایس آئی ڈی ءِ جاری کننگ کن 19 ملین روپئی جتا کرینے تانکہ ملاح تا درملکی بحری جہاز آتے ٹی داخلہ و اخراج ءِ المی کننگ مرے ۔ دا پوسکن آ نظام ءِ نادرا نا کمک اٹ جوڑ کننگ انگ ءِ ۔ وزارت بحری امور نا سینئر کمامدارآک دوشنبے نادے آ اے پی پی ءِ پاریر کہ دا رداٹ فیصلہ غان ملاح تا کنڈآن ملوک آ غاو تا ازالہ ممکن مریک ہرا وزارت نا غاو ویل ءِ ملاکہ ۔ کمامدارآک پاریر کہ وزارت بحری امور پاکستانی بحری سیل و سواتی و ملاح تا آسراتی کن و درملکی جہاز آتیا ملازمت نا بابت ’’او کے ٹوبورڈ‘‘ نا آسراتی نا دوئی کننگ کن ہلہلئی بنداو تیا کاریم کننگ ءِ و دا چرجوئی ٹی درملکی بحری جہاز آتے ٹی روزگار کن وئی نا حد 60 سال ہم رعایت تننگ انگ ءِ ۔ اوپارے کہ وزارت داخلہ غان ہم درخواست کننگانے کہ ملاح تا درملکی بحری جہاز آتے ٹی اوار مننگ نا بابت امیگریشن نا آسراتی فراوان کیر و اوفتے این او سی آن بیدس شمولیت نا موکل تننگے ۔ اوفک پاریر کہ ملاح تے زیات آن زیات آسراتی فراوان کننگ کن روسٹر کانود اٹی ترمیم کننگ انگ ءِ وخت اس کہ تعلقات عامہ نا وخت و پاس ءِ ہم سہب انا 9 آن پیشیم نا 3بجہ اسکان ودفنگانے ہرا داکان مست یک بجہ اسکان ئس ۔ اوپارے کہ دا گام گیج آتیان نئے بیرہ کاریم نا چاگڑد اٹی مثبت بدلی بریک بلکن محکمہ نا بحالی و پائیدار نا مسخت ءِ پورو کننگ اٹی ہم کمک رسینگک ۔