خاتول اول بیگم ثمینہ علوی نا شوکت خانم میموریل ہسپتال پشاور اٹی بریسٹ کینسرنا بابت آگاہی دود آن تران

اسلام آباد ۔ 14اکتوبر (اے پی پی) خاتول اول بیگم ثمینہ علوی پارینے کہ ملک اٹی ہر سال ہزار آ زالبول بریسٹ کینسر نا سو ب آن دنیا ءِ ہلرہ، دا بابت زالبول اٹی جوان آگاہی ودی کننگ نا گرج ءِ، شوکت خانم میموریل ہسپتال غٹ وڑنا کینسر نا مریض آتے آب اٹ درمان نا آسراتی فراوان کیک، الس دا چرجوئی ٹی پبی کمک کے ۔ اوپشاور اٹی شوکت خانم میموریل ہسپتال اٹی بریسٹ کینسر نا بابت آگاہی نا اسہ ددود اسے آن تران کریکہ ۔ اوپارے کہ الس کینسر نا برخلاف جہد اٹی شوکت خانم ہسپتال تون تفے ۔ خاتون اول بریسٹ کینسر نا مریض آتا باقاعدگی اٹ چیک اپ کرفنگ نا مشورہ تس ۔ اوپارے کہ زالبول ملک اٹی شونداری و شونہالی ٹی بے کچ اہم کڑد ادا کننگ ءِ ۔ داڑکن ہر سال بریسٹ کینسر نا گواچی مروک آ پاکستانی زالبول آتا نہادی جان تے بچفنگ اٹ کمک تننگ کن ہروڑگام گیج بایدے کننگے ۔ بیگم ثمینہ علوی پارے کہ مچ آ ملک اٹی سرکاری و نجی ہسپتال آتے ٹی میمو گرافی نا دستیابی المی ءِ تانکہ زالبول اٹی بریسٹ کینسر نا المی تشخیص مننگ کے ۔ اونجی بشخ آ زور شاغا کہ او دا مسخت کن شوکت خانم تون کمک کیر وخت اس کہ میڈیا ءِ بریسٹ کینسر نا بابت الس اٹی آگاہی ودی کننگ کن کڑد ادا کروئی مرے ۔